Amosando publicacións coa etiqueta AETNA. Amosar todas as publicacións
Amosando publicacións coa etiqueta AETNA. Amosar todas as publicacións

martes, decembro 20, 2011

Asociacións ambientalistas esixen solucións para os depósitos de áridos asfálticos de Vilar do Colo


Representantes da Plataforma de Defensa dos Camiños, AETNA, Plataforma de Afectados polo Polígono Industrial de Vilar do Colo, Verdegaia, ADEGA e SGHN, realizaron unha visita ao Monte de San Lourenzo (concello de Cabanas) nunha parcela de solo rústico de uso forestal, propiedade da empresa MANMER na que se atopan, dende o ano 2009, uns amoreamentos de áridos asfálticos procedentes de Holanda. Este materiais foron descargados no Porto Exterior de Ferrol, onde aínda quedan depositadas unhas 300.000 toneladas.

A finalidade da visita era constatar que, a día de hoxe, aínda non se emprendeu obra ningunha, nin se libraron os cinco metros da zona de policía do rego ao que están obrigados, malia a teren transcorrido oito meses despois de ser licitados os acopios por parte da Consellería de Medio Ambiente, e atoparse esa licenza condicionada á instauración, nun prazo de dous meses, dunhas medidas de prevención de impactos ambientais sobre as augas, tanto superficiais como subterráneas e sobre o solo.

Atendendo ás resolucións da Secretaría Xeral de Calidade Ambiental, de Augas de Galicia e da Fiscalía Provincial de A Coruña, -a cal se expresa nestes termos: “Se o seu almacenamento, unha vez advertido, non se realizase coas prevencións establecidas, tal e como advirte o informe, daquela si podería entenderse que poidese traspasar o límite do dereito penal”-, as devanditas asociacións deciden solicitar, por unha banda, que se tomen medidas sancionadoras contra a empresa MANMER por incumprimento das condicións impostas por ditos organismos, e por outro lado que se retome esta cuestión por parte da Administración e a Fiscalía, tendo en conta os seguintes puntos:
a) A ilegalidade da ubicación dos residuos en solo rústico, conculcando gravemente a Lei do Solo.

b) O recoñecemento destes materiais como residuos, xa que non foron debidamente inertizados.

c) A contaminación directa das fontes do río Baa.

d) O cuestionamento das concentracións de sustancias tóxicas, nocivas ou perigosas para o medio ambiente e a saúde humana que poden definir un material como perigoso, tendo en conta que os áridos asfálticos da parcela de Cabanas ocupan solo rústico e non industrial, que o potencial de carga dos ecosistemas circundantes é moi reducido e que os puntos anteriores hai que poñelos en relación co inmenso volume (60.000 toneladas) dos materiais amoreados.

e) A posible consideración de tráfico ilegal, dende a orixe da operación de traslado, segundo sinala a normativa europea para o traslado de residuos entre países comunitarios.

f) Os intereses ambientais, por existir hábitats prioritarios na contorna, os intereses económicos, pola posible afección aos bancos marisqueiros de Mugardos e Barallobre, e o interese prioritario da toma de auga potable para consumo humano, dado que en Mugardos existe un punto de captación de auga para ese uso.
Por todo isto, solicitarán a actuación da Fiscalía de Delictos Ambientais, e á Consellería de Medio Ambiente que se ordene o traslado dos residuos a unha instalación que reúna as condicións de seguridade necesarias para o almacenamento destes materiais, en tanto non se resolva sobre o seu destino final.

Enviado por:
FERROL
-ferrol@sghn.org-
19 de dezembro de 2011 12:43
_____________

A noticia no xornal comarcal "Diario de Ferrol":

Asociacións ambientalistas piden solucións para os depósitos de áridos de Manmer

_________________

venres, setembro 30, 2011

4ª Limpeza Simultánea de Rios da Galiza - Domingo 2 de Outubro - En Fene coa Asociación Etnográfica e da Natureza Amigos e Amigas do río Baa -AETNA - En San Sadurniño no Río Xubia

IV LIMPEZA SIMULTÁNEA DE RÍOS
Domingo 2 de Outubro de 2011

Este 2 de Outubro celebraráse a IV Simultánea de Ríos. Xa levamos organizando dende o 2008 este día de Limpeza Simultánea en numerosos concellos de Galiza. É un día no cal voluntarios e voluntarias saen aos seus ríos para recoller o lixo que atenta contra a riqueza dos nosos ecosistemas fluviais. Miles de quilogramos de refugallos xa foron extraídos de moitos ríos galegos polos centos de voluntarios/as que teñen participado nas limpezas anteriores.

Animámosvos a participar este ano para que vaiades ao voso río e recollades ese lixo que acaba coa súa biodiversidade e beleza.

O máis importante deste día é a labor de concienciación social que entre todos e todas realizamos. Axudamos a manter un bo estado de conservación nos nosos ecosistemas fluviais e facémoslle ver á cidadanía que as pequenas accións valen moito.

Se estás interesado en participar podes porte en contacto con nós:

Correo: lucia@adega.info
Tlf. 981 57 00 99 / 669 80 69 08


Domingo 2 de Outubro de 2011

En Fene, desde as 10 da mañá coa Asociación Etnográfica e da Natureza Amigos e Amigas do río Baa -AETNA

AETNA
http://www.aetna.es/

Contactos:

Marela Aguilar Prieto
Xiao Couto García: 981 360 468


No concello de San Sadurniño, soman-se á iniciativa do Proxecto Ríos.

Nova tirada do Diario de Ferrol
:

"San Sadurniño súmase mañá á IV Xornada de limpeza simultánea en ríos, unha campaña que se desenvolverá de forma paralela en numerosas canles da comunidade e na que o Concello sempre tomou parte. En total, unha quincena de voluntarios inscribíronse nesta iniciativa ambiental, segundo os datos facilitados pola Concellaría de Medio Ambiente.

A actividade comezará ás dez da mañá e o grupo de voluntarios sairán do mesón A Granxa. Durante a mañá percorrerán o tramo do río que discorre por Ferreira e Lama. A limpeza concluirá cara á unha e media da tarde.

A edil de Medio Ambiente, Amparo Calvo, destaca o positivo resultado desta acción en edicións anteriores, tanto desde o punto de vista ecolóxico como social. No primeiro aspecto, a limpeza permite recoller todo tipo de residuos, desde plásticos agrícolas ata pneumáticos, así como en ocasións detectar vertedoiros incontrolados. Ademais, engade, o encontro permite aos veciños coñecer mellor a beleza da contorna paisaxística do municipio, cunha poboación moi dispersa nos 100 quilómetros cadrados de superficie local
".


Limpeza de ríos - Qué debemos ter en conta:
http://limpeza.proxectorios.org/limpeza-de-rios/

Qué é o proxecto Ríos?

O Proxecto Ríos é unha iniciativa de concienciación, educación e participación cidadá en defensa dos nosos ríos. Fundaméntase na realización de inspeccións do estado dos ríos galegos por parte de persoas ou grupos voluntarios a nivel local, co obxectivo final de facerse responsábeis da vixianza (adopción) do río que pasa polo seu municipio ou localidade.

http://proxectorios.org/index.php

ADEGA e o Proxecto Ríos: Móllate polos Ríos

Antón Muñiz. ADEGA-Trasancos
xamute@gmail.com

Delegación de Ferrol (Trasancos)
Apdo Correos 481; 15480 Ferrol
www.adega.info

__________________________