Amosando publicacións coa etiqueta Asociación Galega para a Defensa da Sanidade Pública. Amosar todas as publicacións
Amosando publicacións coa etiqueta Asociación Galega para a Defensa da Sanidade Pública. Amosar todas as publicacións

xoves, abril 21, 2022

Sobre as consultas ao persoal de Psicoloxía que traballan nas Unidades de Saúde Mental e sobre as consultas directas aos Servizos de Fisioterapia a través da Plataforma XIDE - Comentarios e denuncias da Asociación Galega para a Defensa da Sanidade Pública


Ante as recentes informacións difundidas polo SERGAS de que xs profesionais de Medicina Familiar e Comunitaria poderán solicitar directamente consultas ao persoal de Psicoloxía que traballan nas Unidades de Saúde Mental e que a poboación en xeral poderá tamén solicitar consulta directa cos Servizos de Fisioterapia do SERGAS a través da Plataforma XIDE, desde a Asociación  Galega para a Defensa da Sanidade Pública queremos informar o seguinte:

1.- Que a incorporación de especialistas en Psicoloxía e Fisioterapia aos Centros de Saúde é unha reivindicación que a nosa Asociación leva anos solicitando e é unha esixencia que expuxemos no Consello Técnico de AP de Galicia, fai mais de dous anos.

2.- O SERGAS, lonxe de responder a estas demandas, adoptou unha decisión que só podemos cualificar de cínica e destinada a enganar á poboación e aos profesionais sanitarios de ap, dado que estas medidas non van acompañadas da creación das novas prazas necesarias, nin do incremento orzamentario necesario para a súa creación.

3.- No caso da Psicoloxía Clínica o cociente de  especialistas por 100.000 habitantes en Galicia é de 3,5, fronte a 5,7 no resto do Estado e de 18 na Unión Europea. A media de agarda, antes da pandemia, era de máis de tres meses, cifra que se multiplicou tras a mesma (coa nova medida do SERGAS, sin orzamento, crecerán de forma exponencial). Unha de cada tres consultas en Atención Primaria teñen que ver coa saúde mental.

4.- En Fisioterapia o cociente actual é de 1 por 8.300 habitantes, cando a Organización Mundial da Saúde indica que debería ser 1 por cada 1.200. As listas de agarda oscilan entre 2 e 8 meses (coa medida anunciada serán de anos). O envellecemento da poboación, condiciona que entre o 30% e o 40% das consultas de Atención Primaria precise dalgún tipos de tratamento fisioterapéutico.

Desde a  AGDSP ademais de denunciar este engano, esiximos ao SERGAS un incremento orzamentario do 11,9% actual ao 25% do total sanitario, para dotar realmente destes recursos aos Centros de Saúde, realizar xa o cumprimento acordado nas 15 Comisións Técnicas do Consello Técnico de AP de Galicia, sobre a dotación de novas categorías profesionais aos equipos e un calendario para a súa entrada en vigor.

É necesario desmasificar as consultas  médicas e os Centros de Saúde, acabar coas inaceptables listas de agarda e atender as lexítimas e necesarias demandas de atención psicolóxica e fisioterapéutica da poboación.

19 de abril de 2022

Asociación Galega para a Defensa da Sanidade Pública

Enviado por:
PLATAFORMA FERROLTERRA
-plataformasosanidadepublica@gmail.com-
20 de abril de 2022 13:12

_______

luns, abril 11, 2022

Sobre as probas diagnósticas de laboratorio e radioloxía en Atención Primaria - Asociación Galega para a Defensa da Sanidade Pública


A ASOCIACIÓN GALEGA PARA A DEFENSA DA SANIDADE PÚBLICA, SOBRE PROBAS DIAGNÓSTICAS EN ATENCIÓN PRIMARIA

Dende a Asociación  Galega para a Defensa da Sanidade Pública consideramos unha boa noticia a instrución do SERGAS ás xerencias de Área Sanitaria, para que os Centros de Saúde podan acceder a probas diagnósticas de laboratorio e radioloxía, reservadas ata o de agora aos servizos hospitalarios.

Consideramos, caso de que esta instrución sexa finalmente aplicada, un éxito da estratexia de presión e negociación das organizacións que integramos o Consello Técnico de AP de Galicia que levamos anos reivindicando a supresión das limitacións de acceso a probas diagnosticas desde a AP.

Esta medida, mellora a capacidade resolutiva dos Centros de Saúde que redundará nunha mellora na calidade da atención a cidadanía.

Dados os antecedentes sobre a aplicación real deste tipo de medidas,  consideramos urxente a elaboración e aplicación dos Protocolos que regulen as solicitudes polas xerencias de área, de maneira consensuada entre Atención Primaria e a Hospitalaria.

Reiteramos a esixencia de que tamén se retiren os filtros ás solicitudes de derivacións e  interconsultas  de pacientes entre Atención Primaria e Hospitalaria, que ademais de poñer en cuestión a capacidade diagnóstica do persoal médico de Atención Primaria, supón uns incrementos  inaceptables das listas de agarda.

6 de abril do 2022

AGDSP

Enviado por:
PLATAFORMA FERROLTERRA
-plataformasosanidadepublica@gmail.com-
10 de abril de 2022 22:39

_______

luns, xuño 21, 2021

Novamente, o SERGAS, pechará camas hospitalarias co argumento das vacacións e a falta de persoal substitutx, aínda que a verdade é que o obxectivo é seguir recortando gastos, reducindo a actividade asistencial


Dende a AGDSP queremos manifestar a nosa máis enérxica protesta, pola irresponsable actitude da Consellaría de Sanidade, durante o verán.

Novamente, o SERGAS, pechará camas hospitalarias co argumento das vacacións e a falta de persoal substitutx, aínda que a verdade é que o obxectivo é seguir recortando gastos, reducindo a actividade asistencial.

Pecharanse 135 camas en Vigo (que se suman ás 120 pechadas no Hospital Meixoeiro), 131 na Coruña, 128 en Lugo, 91 en Santiago-Barbanza, 67 en Pontevedra e 36 en Ferrol.

Esta decisión, supón un grave risco para a saúde das persoas con enfermidades e necesidade de atención hospitalaria, tras a suspensión de consultas, probas diagnósticas e intervencións cirúrxicas pola pandemia COVID, xa que:

✔ Incrementa o déficit de camas tras o peche de 1.013 desde o 2008. Galicia dispón de 3,3 camas por cada mil habitantes: un 66% inferior ás 5 por mil da Unión Europea.

✔ Coincide cun aumento da demanda de atención hospitalaria: con 334.493 hospitalizacións e 290.333 intervencións cirúrxicas, e cun aumento da lista de espera cirúrxica que creceu un 25%, así como as consultas nun 14% (pese á maquillaxe).

✔ Non permitirá afrontar o exceso de mortalidade por enfermidades oncolóxicas, cardiolóxicas, neurolóxicas, respiratorias..., agravadas e pendentes de diagnosticar e tratar polo peche de camas, plantas, recursos diagnósticos ou operacións, durante a pandemia (en maiores de 74 anos, a mortalidade é un 63% superior á esperada).

A isto, habería que engadir que da metade das persoas con enfermidades crónicas, tiveron problemas para continuar con normalidade os seus tratamentos nos centros de saúde e hospitais, polas trabas na derivación, o que supuxo a paralización de probas, de tratamentos farmacolóxicos ou rehabilitadores. Preto do 40% de todas as consultas do sistema foron telefónicas.

Por todo íso, dende a AGDSP, esiximos:

✔ A paralización dos peches de camas previstos este verán.

✔ Un Plan urxente para atender aos miles de persoas que se acumulan nas listas de espera (só na cirúrxica superan as 60.000, 35.817 na lista de espera estrutural e máis de 30.000 estimadas, na non estrutural oculta á poboación). Os centros hospitalarios deben abrir mañá e tarde ata acabar con esta situación.

✔ Recobrar a normalidade nos Centros de Saúde e reforzar os seus recursos para mellorar a súa capacidade resolutiva.

✔ Potenciar a mellora na relación entre Atención Primaria e os Hospitais.


ASOCIACIÓN GALEGA PARA A DEFENSA DA SANIDADE PÚBLICA (AGDSP)
_______

sábado, setembro 09, 2017

Comunicado da Asociación Galega para a Defensa dá Sanidade Pública, ante a información de que a patronal da sanidade privada (IDIS) pretende que o SERGAS destine 88 millóns de euros para eliminar a Listas de Espera Quirúrxica utilizando os centros privados

O Consello Consultivo de IDIS está formado por representantes do Patronato do Instituto para
o Desenvolvemento e Integración da Sanidade (IDIS) e as súas patrocinadores: Accenture,
Amgen, Boston Scientific, Xeral Electric Healthcare, Indra, Johnson & Johnson Medical
Companies, Medtronic, MSD, Philips, Roche, Siemens y Telematic & Biomedical Services.
Novembro de 2016.

Ante a proposta patronal privada para reducir listas espera


Ante a información de que a patronal da sanidade privada (IDIS) pretende que o SERGAS destine 88 millóns de euros para eliminar a Listas de Espera Quirúrxica utilizando os centros privados, desde a Asociación Galega para a Defensa dá Sanidade Pública queremos comunicar:

1º- Que os plans de choque baseados no uso intensivo dos quirófanos, ben mediante concertos ou con peonadas na pública, resultaron sempre un fracaso, dado que ao pouco tempo volven crecer aos niveis previos xa que esta medida non afronta de xeito integral os determinantes das listas como a falta de camas pública, a escaseza de persoal medico e de apoio, a non utilización dos recursos en horario de tarde, a baixa produtividade dos quirófanos,  ou a ausencia de incentivos profesionais. Á cor da crise pecharon case 500 camas nos hospitais públicos e este veráns máis de 1.000 camas.

2º.- Recorrer á sanidade privada non é a solución como demostra que o único hospital privado cun área sanitaria como POVISA en Vigo duplica as listas de espera quirúrxica dos centros públicos galegos.

3º.- Esta desviación de fondos públicos á privada supoñería un novo avance da descapitalización de SERGAS, que xa destina máis do 11% do seu gasto a concertos coa privada. A sanidade privada esixe un aumento do 2.5% do capitulo de concertos (un aumento do 25%) o que supoñería un enorme avance da privatización. Pese ao incremento dos fondos para concertos as listas de espera seguen sendo totalmente inaceptables.

4º- Que o SERGAS tolere a dobre dedicación á pública e á privada dunha parte do persoal sanitario, especialmente dos xefes de servizos, favorece o crecemento das listas (xa este persoal esta interesado en reducir a actividade en centros quirófanos públicos para desviala á concertada onde tamén traballa) e sobre todo favorece a corrupción pola vulneración sistemática da Lei de Incompatibilidades.

Por todo iso esiximos que a Consellería de Sanidade e o SERGAS rexeite esta proposta da patronal privada, abra as camas e quirófanos pechados nos últimos anos , utilice os quirófanos e recursos diagnósticos pola tardes, dote ao sistema dunha política de persoal incentivadora que recupere a carreira profesional dos traballadores sanitarios e acabe coa dobre dedicación na sanidade pública.

Asociación Galega para a Defensa da Sanidade Pública

5 de setembro do 2017

Enviado por:
Plataforma en Defensa da Sanidade Pública Ferrol
-plataformadspferrol@gmail.com-
8 de setembro de 2017 20:43

__________________

mércores, xaneiro 27, 2016

A enorme débeda sanitaria do goberno de Feijóo pon en risco a sanidade galega, denuncia a Asociación Galega para a Defensa da Sanidade Pública


Enorme débeda sanitaria de Galicia. |
A enorme débeda sanitaria do goberno de Feijóo pon en risco a sanidade galega.

Co plan de pago a provedores de Montoro sáldase, no ano 2012, a práctica totalidade da enorme débeda sanitaria que as CCAA acumularan nos primeiros anos da crise económica, que só en tecnoloxía sanitaria e medicamentos hospitalarios ascendía a 11.600 millóns de euros.

A este plan non se suman o País Vasco nin Navarra, cunha débeda relativamente escasa (88 millóns e 25 millóns respectivamente), nin tampouco Galicia, malia unha avultada débeda sanitaria de 458 M de euros, seguramente porque Feijóo quixo evitar o conseguinte control do Ministerio de Facenda sobre a Xunta.

De novo as facturas das CCAA volven acumularse, e requiren novos desembolsos estatais, debido a que as empresas sanitarias son "un saco sen fondo". Así, entre Xaneiro e Outubro de 2015 orixínase unha débeda que roza os 8.000 millóns de euros, a un ritmo mensual de 763.

Nese período a Xunta acumula unha débeda sanitaria de 368 millóns de euros, aos que haberá que sumar os máis de 500 de débeda anterior e os compromisos anuais das súas innecesarias e desastrosas privatizacións (72millóns/ano do canon do hospital de Vigo, 75 millóns/ano do concerto con Povisa e as custosas externalizacións de servizos sanitarios e non sanitarios).

A avultada débeda farmacéutica e tecnolóxica xerada en 2015 é especialmente preocupante, xa que reflicte o control da industria sobre as decisións do sistema sanitario.

A cesión da xestión da investigación pública do Sergas á industria farmacéutica e da xestión da alta tecnoloxía ás multinacionais tecnolóxicas, unido á rápida e continuada aprobación de fármacos a prezos cada vez máis estrambóticos para o mesmo proceso, incrementarán aínda máis a débeda sanitaria, o que levará a un círculo vicioso de novos recortes e privatizacións e á insostenibilidade do SNS.

Cada día é máis evidente a necesidade dun cambio de rumbo na política sanitaria e no goberno de Galicia

Asociación Galega para a Defensa da Sanidade Pública

22 de xaneiro do 2016

--
Foto de Avantar, baixo unha licenza de Creative Commons. Rolda de prensa d@s representantes da Asociación Galega para a Defensa da Sanidade Pública e de SOS Sanidade Pública, despois de remitir por correo á Comisión Europea a denuncia contra o proceso de licitación do Hospital de Vigo por presunto incumprimento do Dereito Comunitario do Reino de España na persoa do Goberno da Xunta de Galicia (02.09.2015).

Plataforma en Defensa da Sanidade Pública de Ferrol
www.plataformadspferrol.blogspot.com
plataformadspferrol@gmail.com

Enviado por:
Plataforma en Defensa da Sanidade Pública Ferrol
-plataformadspferrol@gmail.com-
22 de janeiro de 2016 18:00

___________________

venres, abril 17, 2015

O TTIP e as ameazas máis importantes para a sanidade pública - Porque mobilizar-nos contra o Tratado Transatlántico de Comercio e Investimentos entre a Unións Europea e os EEUU - En Ferrolterra, o 18 de Abril, ás 12:30hs na Praza de Armas


CONTRA DO TRATADO DE LIBRE COMERCIO


Desde xuño de 2013 a Comisión Europea,  e o Departamento de Comercio de EE UU están negociando unha Asociación Transatlántica para o Comercio e o Investimento (TTIP), que non se aprobará antes de 2016. Esta negociación caracterizouse pola opacidade e a falta de transparencia malia que os acordos afectan aos cidadáns.  A crise económica é a xustificación dun proxecto que pretende liberalizar as relacións comerciais USA UE, aínda que en realidade está dirixido a consolidar normas e lexislacións que amparan aos fondos de investimento e ás grandes empresas multinacionais.

Este Tratado e unha continuación dos Acordos da Organización Mundial do Comercio e a Unión Europea sobre Liberalización de Servizos que supuxeron a privatización dos servizos públicos  na UE.  O TTIP pon os intereses das multinacionais  por diante dos dereitos cidadáns.

O proceso de negociación con conta coas organizacións da sociedade civil como sindicatos, organizacións ecoloxistas, veciñais, de consumidores e ata dos gobernos elixidos democraticamente (negóciao a Comisión Europea que non esta sometida ao control do Parlamento Europeo). Sen embargo as multinacionais e os lobbies de presión han tido a  oportunidade de participar e influenciar nas propostas.

Principais claves do acordo:
  • Limitar a soberanía dos gobernos facilitando as demandas das multinacionais para a posta en práctica de políticas que afecten aos seus intereses.
  • Outorgar ás grandes empresas amplas facultades para impugnar novas leis polos gobernos, o que fará irreversibles ás privatizacións dos servizos públicos..
  • Abrir aos mercados sectores crave dos países europeos como a enerxía, as patentes, a sanidade pública, ou a soberanía alimentaria.
  • Desregular os servizos financeiros, coa eliminación das restricións en materia de transaccións financeiras e da comercialización de produtos financeiros derivados (un dos desencadéantes da crise).
  • Desenvolver o chamando Mecanismo de Solución de Diferenzas entre Inversor e Estado (ISDS), con normas para protexer a seguridade xurídica dos inversores que inclúe disposicións contra a expropiación de servizos de interese público ou a libre circulación e transferencia de fondos.
Os obxectivos en materia sanitaria do Tratado están dirixidos a eliminar medidas reguladoras (non arancelarias) que afectan ao comercio:  Condicionar as normas europeas que obrigan á transparencia dos ensaios clínicos dos laboratorios farmacéuticos; reducir as regulacións ambientais e alimentarías que garanten a calidade e seguridade dos mesmos;  incrementar os dereitos de propiedade intelectual das empresas farmacéuticas prolongando os períodos das patentes de medicamentos e innovacións tecnolóxicas; e protexer o investimento das empresas privadas nos sistema sanitarios.

As ameazas máis importantes para a sanidade pública contidas no Tratado son:
1º. - Os gobernos non poderán recuperar os servizos externalizados ou privatizados, aínda que sexan un desastre e os seus gastos exorbitantes (como os hospitais PFI de Madrid ou de Vigo, que multiplican por sete o seu custo real).  As empresas poderán protexer os seus investimentos cun Arbitraxe Inversionista - Estado, que outorga ás corporacións o dereito de demandar a un goberno que tome decisións que danen as súas ganancias, á marxe dos tribunais nacionais de xustiza.  A concesión de indemnizacións dos investimentos das empresas nos sistemas sanitarios públicos supoñerá unha seria ameaza para a capacidade dos gobernos de intervir na defensa do interese público.

2º.- Os gobernos non poderán fixar prezos para os produtos farmacéuticos, promover medicamentos xenéricos, aplicar programas para control do tabaquismo ou da seguridade e calidade dos alimentos:
  • Prolongar o tempo de vixencia das patentes dos medicamentos a máis de 20 anos.
  • Atrasar a entrada dos xenéricos no mercado.
  • Reducir os requisitos para as patentes, para facilitar a comercialización das innovacións biotecnolóxícas.
  • Incrementar o período de protección dos datos dos medicamentos biolóxicos a máis de 12 anos (entre 4 8 na actualidade).
  • Garantir a presenza dos laboratorios nos organismos estatais  que fixan as políticas de prezos (Dirección Xeral de Farmacia e Axencia Española do Medicamento), mediante as chamadas Garantías Procesáis.

3º.- A Converxencia Regulamentaria esta dirixida a suplantar a  OMS no establecemento de normas de rexistro, calidade, seguridade e eficacia dos medicamentos, en función dos intereses das multinacionais.

4º.- Crear un Comité Industria-Gobernos para monitorizar o cumprimento do acordo (patentes, normas de xenéricos, fixación de prezos e reembolsos).
Todas estas medidas incrementarán de xeito brutal os gastos sanitarios, poñerán en risco a sustentabilidade dos sistemas sanitarios públicos, dificultarán o acceso aos medicamentos, aumentarán a irracionalidade do sistema, e afectarán á saúde da poboación xerando maior mortalidade e carga de enfermidade.


Principais consecuencias:
  • Diminución das esixencias de seguridade para os consumidores (comercialización dos alimentos transxénicos ou a desinfección de poios mediante cloro , prohibidos en Europa e aprobados en Estados Unidos).
  • Recortes e perda de control público en educación formación, desenvolvemento científico e dereitos de propiedade intelectual, ao servizo das grandes corporacións privadas.
  • Precarización das condicións laborais e salariais dos traballadores sanitarios, destrucións de emprego nos servizos sanitarios e sometemento da súa actuación aos intereses empresariais.
  • Desaparición das regulacións medio ambientais que garanten a saúde pública como a autorización do fracking para obter gas do subsolo utilizando produtos químicos, que poden contaminar os acuíferos ou as prospeccións petrolíferas sen control.
Por todo  isto esiximos a paralización das negociacións do tratado.

Chamamos a cidadanía galega a apoiar ás mobilizacións  do  18 de abril, na Xornada Global contra el TTIP.

Asociación Galega para a Defensa da Sanidade Pública

Enviado pola:
Plataforma en Defensa da Sanidade Pública Ferrol
-plataformadspferrol@gmail.com-
16 de abril de 2015 23:28

http://www.plataformadspferrol.blogspot.com

_______

FERROLTERRA NA MOBILIZACIÓN GLOBAL DO SÁBADO 18 DE ABRIL

Ás 12:30hs na Praza de Armas, diante do palacio Municipal de Ferrol

Facemos un chamamento á cidadanía de Ferrolterra e a todas as organizacións presentes na cidade a que se mobilicen o 18 de abril contra este tipo de tratados de libre comercio que pretenden facer máis efectivo o trasvase de riqueza cara as elites.

En Ferrolterra sumámonos cunha Concentración - Acción - Asemblea Popular Aberta, na Praza de Armas.

Á diversidade de tácticas e accións solidarias que se preparan a redor de todo o planeta para contribuir a informar buscando a participación e mobilización da xente, rumbo a un novo modelo económico e de comercio que funcione para o beneficio de todas as persoas e o planeta, agora e no futuro.

Non ao TTIP !!

________________________

venres, marzo 13, 2015

O Informe da Comisión Galega de Bioética sobre a Desigualdade na Asistencia, vén corroborar o que veñen denunciando desde a Asociación Galega para a Defensa da Sanidade Pública e as diferentes plataformas locais e a galega SOS Sanidade Pública - Achega-se o texto do informe

Valoración sobre o informe da Comisión de Bioética

O Informe da Comisión Galega de Bioética sobre a Desigualdade na Asistencia (cuxa publicación foi bloqueada pola Consellería de Sanidade o que desencadeo a dimisión de 7 membros da mesma), vén corroborar o que vimos denunciando desde fai tres anos:
  1. Que o Real Decreto Lei 16/2012 de medidas urxentes para garantir a sustentabilidade do Sistema Nacional de Saúde atenta contra a universalidade a equidade e a accesibilidade á asistencia sanitaria,.
  2. Este cambio na lexislación, esta xerando desigualdades inxustas e inaceptables, eticamente, desde a óptica sanitaria, xurídica e social.
  3. A necesidade imperiosa de derrogar este instrumento legal que pretende reducir gasto sanitario, a costa de recortar o dereito fundamental á saúde de todos e todas as cidadás e cidadáns, teñan ou non traballo ou a posibilidade de cotizar como as persoas inmigrantes ou a mocidade en desemprego.
Desde a nosa Asociación queremos denunciar a incapacidade da actual Xunta de Galicia de tolerar a menos crítica, aínda que proveña dunha Comisión cuxos membros foron elixidos pola propia Consellería (o que supón que son da súa confianza) e que reflicte unha situación de fraxilidade política e deterioro ético incompatibles coa función de xestionar o sistema sanitario público galego.

12 de marzo, de 2015

Asociación Galega para a Defensa da Sanidade Pública -AGDSP.

Informe da Comisión Galega de Bioética sobre a Desigualdade na Asistencia, | aprobado o 17 de Setembro de 2014. | Ocultado pola Conselleira de Sanidade, Rocío Mosquera Álvarez, perante todos estes meses | 16 páxinas en formato pdf | Acceder/Baixar.

O asunto na rede a través do buscador libre (gnu-linux): DuckDuckGo.

Enviado por:
Plataforma en Defensa da Sanidade Pública Ferrol
-plataformadspferrol@gmail.com-
13 de março de 2015 01:06

http://www.plataformadspferrol.blogspot.com

_________________