Xurdimos a favor dunha política xusta, democrática, participativa e sustentábel, responsábel cara o futuro da humanidade e do resto das especies, respectuosa e defensora do medio natural, na convicción de que un outro mundo non só é posíbel senón que é necesario.
O 22 de agosto deste ano celebrouse o 50 aniversario da inauguración do barrio de Caranza. Un barrio ben deseñado en canto a dotación de zonas verdes e servizos tendo en conta a época en que foi construido.
Medio século despois, asistimos a un deterioro preocupante. Hai poicos días retiráronse as cabinas telefónicas públicas. Hai unha escaseza de fontes públicas repartidas polo barrio. Do Parque do Montón xa nin falamos. Seguimos sen comedor senior e os parques presentan un aspecto de abandono e destrozo abraiante que incluso, nalgúns casos, pode resultar perigoso para a veciñanza.
Aquí enviamos fotos do Parque Fontelonga, para mostra.
Fotos: Vai para tres meses, ao pouco tempo de comezar, do abandono das obras de nova construcción do Parque de Fontelonga, adxudicada por máis de 528.000 euros, ao renunciar a empresa contratista por problemas económicos.
Enviado por: LiGanDo Ferrol
-ligando.ferrol@gmail.com-
8 de outubro de 2022 18:05
_______
Grande Foliada en Caranza, coa participación de Lenda Ártabra, Maghúa, Quenindiole, Pan sen fron, Foliada libre, Donas e galáns, No Cómbaro, As mozas das voltas, Cantos de taberna das Pontes, Ghaldaripas, Xoldaina, Cantos de taberna do Galicia e Son d'aquí.
Día: domingo 19 de decembro. Hora: 12:30hs. Lugar: SCDR. Galicia de Caranza (Avenida de Castelao, 36 - Ferrol).
MAREA DE FERROL MANTÉN UNHA XUNTANZA COA AA.VV. CARANZA
O pasado mércores 24 de abril, Marea de Ferrol mantivo unha xuntanza coa AA.VV. Caranza, seguindo coa súa rolda de comunicación e diálogo co tecido asociativo ferrolá.
O soterramento das liñas de alta tensión, as dificultades de aparcamento na zona do Auditorio, a recuperación do xardín botánico como zona verde pública, as melloras nos accesos e dotacións da praia, a falta de instalacións deportivas axeitadas, ou a necesidade dun centro social para as persoas maiores do barrio, foron algunhas das preocupacións e problemas específicos do barrio que as veciñas de Caranza nos trasladaron.
Desde Marea de Ferrol volvemos a constatar a necesidade de recuperar os programas de participación cidadá como mecanismo imprescindible para convivir en verdadeira democracia na cidade, construíndo unha muralla cidadá que permita frear o avance das políticas de dereitas, e fomente a unidade estratéxica das forzas progresistas da cidade.
O luns 30 de xullo de 2018, tiña lugar en sesión extraordinaria urxente a continuación do Pleno de fin de mes, que se estivo celebrando o xoves da pasada semana. Foron cinco horas de Pleno e entre os puntos que quedaban por tratar, estaba unha moción do grupo municipal de Ciudadanos que presentaba a concelleira Ana Rodríguez Masafret e que apoiaba a presidenta da "Asociación de Veciños de Caranza", Mapi Rodríguez Venancio, que ten unha teima desmesurada contra a horta comunitaria de Caranza. Horta que foi creada hai xa uns 7 anos nuns terreos da Autoridade Portuaria, por ser parte dun recheo da enseada que baña a ribeira leste do barrio, sobre uns 4.800 metros cadrados que están cultivando, na actualidade, sobre unhas 35 persoas.
Mesmo a presidenta da asociación veciñal, Mapi R. Venancio, chega a mentir no Pleno na súa intervención, vítima da súa obsesión, falando de problema, chabolismo e que lle constaba de que había persoas que vivían nas hortas.
Non é a primeira vez que a presidenta da asociación veciñal quere desfacer-se das hortas, xa hai uns anos que o intentara, mais daquela brotara, case de inmediato, a solidariedade da xente e de asociacións do barrio como López Bouza, Fuco Buxán, A Revolta, as ANPAs dos centros públicos, a da asociación de mulleres e a de operadores do Mercado Municipal. Con esta solidariedade e cos medios que expuxeron o que estaban a facer nas hortas, conseguiu-se paralizar a mala intención de Mapi R. Venancio.
Agora coa desculpa da moción din que pretende "poñer a disposición dos veciños un horto urbano dentro do Parque do Montón". Mapi R. Venancio, pretende destruír as actuais hortas urbanas de Caranza, coa desculpa de abrir uns hortos no Montón. Non só o descoñecemento da realidade de cada cousa leva á concelleira Masafret a propoñer tal cousa, senón a manipulación de Mapi é a que, de xeito oportunista, pretende con esta moción eliminar a iniciativa das hortas de Caranza. As instalacións municipais do Montón, albergan un parque botánico con decenas de especies catalogadas (e máis de 1.200 árbores), unha zona de descanso (con mesas e bancos), unha edificación e uns poucos bancais para hortos didácticos (para cursos e visitas escolares), nunca colleiteiros, como son os das actuais hortas de Caranza. Peor foi a actitude dos grupos políticos municipais que apoiaron o terceiro punto da moción, PP, Ciudadanos e o do Alcalde Jorge Suárez, Ferrol en Común, sen ter en conta a opinión das persoas que na actualidade están traballando nas hortas urbanas de Caranza. Desastrosa actuación deste goberno municipal que clamaban pola participación cidadá antes de ser goberno municipal e mesmo que levan no seu programa o apoio a estas iniciativas que se dan en Caranza e noutros barrios da cidade.
No parque botánico do Montón, na zona do mesmo nome, onde se chegaron a investir máis de 700 mil euros de diñeiro público, hai un abandono absoluto por parte do goberno municipal. Un parque onde non hai nin vixilancia, nin mantemento. No que roubaron as portas, cun absoluto deterioro do recinto de protección, onde prolifera un vertedoiro incontrolado e o deterioro da edificación rehabilitada é patente. Unha edificación obxecto de vandalismo, onde desapareceron as cañeiras, a instalación eléctrica, as portas e as contras e xanelas. Tal é o abandono que uns sen teito, fixeron da edificación a súa vivenda. Esta é a terceira moción que o Concello aproba para "recuperar" de novo O Montón. Unha nova función de hipocrisía. Para tapar a súa incapacidade e mal goberno, queren utilizar, de chibo expiatorio, ás persoas que desde hai tempo fixeron da explanada improdutiva da ribeira de Caranza, unha zona produtiva, de agricultura colleiteira, de lecer e didáctica, de aprendizaxe de cultivos, onde se plantaron máis de 40 arbustos e árbores froiteiras, da creación de sistemas de rego e recollida de auga da chuvia, cría de aves de curral e elaboración de compost a través de residuos orgánicos, e un verdadeiro recreo para moitas persoas que gozan vendo traballar e contribuíndo coas súas vivencias pasadas na aldea... As hortas urbanas de Caranza, son un exemplo de convivencia en relación coa natureza e de obtención de produtos do campo de xeito ecolóxico para o autoconsumo...
Pasado o verán de 2015, o Alcalde Jorge Suárez, recen estreado como tal, visitou as hortas de Caranza e fixo unha reunión coas persoas que nelas traballaban, comprometendo-se a súa regularización e dotar de auga ás mesmas. Cousa que non cumpriu até a data, até tal punto que despois se lle volveu requirir que cumprira os seus compromisos e mesmo desprazou-se unha comisión para falar co Concelleiro delegado Luís Victoria, para solictar-lle un punto de auga demanda que non se atendeu. Ao final desta primavera e principios de verán, as comunitarias recolleron máis de 1.500 sinaturas para solicitar unha fonte no paseo de Caranza e que esta puidera dar servizo ás hortas, demanda que segue sen resposta. Mais agora a resposta do goberno municipal, xa se ve cal é, actuar praticando unha política clientelar, favorecendo as obsesión dunha presidenta que teima con desfacer-se de todo o que non controla no barrio, nada se pode mover, nin iniciativa que saia adiante, sen a súa aprobación e consentimento, unha verdadeira actuación negativa para a participación e a felicidade das persoas que conseguen tirar uns poucos produtos da terra, sen facer dano a ninguén.
As hortas de Caranza, son un paso moi importante na autoxestión veciñal, o paso que ten que dar o goberno municipal é cumprir as súas promesas, axudar ás comuneiras e dotar de auga ás hortas, consensuar un regulamento coas persoas usuarias e facilitar máis espazos, mesmo no Bertón, para quen quixer cultivar en zona urbana.
---
O vídeo que segue é un detalle do Pleno, onde se tratou a moción citada, punto que durou case unha hora, os primeiros minutos son a intervención da presidenta da asociación veciñal Mapi R. Venancio.
Manifesto da Horta Comunitaria de Caranza: Para que en Ferrol non falte o pan. | Acceder/Baixar. Este manifesto foi entregado por rexistro no Concello de Ferrol, logo de que o Alcalde visitara a Horta en Outubro de 2015.
A Marea Ártabra convoca este sábado, 18 de Abril, ás seis da tarde o seu primeiro acto públicono barrio de Caranza. No local social do Galicia de Caranza. Trátase dunha Asemblea Aberta onde se van explicar as liñas básicas deste movemento cidadá e presentar as persoas que conforman a súa candidatura para as próximas eleccións municipais. O debate aberto a continuación abordará cales deben ser as liñas prioritarias de actuación da Marea Ártabra no barrio.
A MAREA ÁRTABRA APOIA A MOBILIZACIÓN INTERNACIONAL CONTRA O TTIP
Desde a Marea Ártabra queremos convidar a todos e todas as nosas veciñas, a mobilizarse o próximo 18 de abril en contra do Tratado de Libre Comercio da UE con EE.UU.
Este tratado contradí todos os valores e principios nos que se basea a Marea Ártabra para construír a súa alternativa municipal.
Na Marea Ártabra queremos transparencia e democracia participativa. O TTIP estase negociando con total escurantismo. A cidadanía non ten aceso aos documentos, e non vai ser consultada, vía referendo, por exemplo, para a súa aprobación.
Na Marea Ártabra consideramos que a defensa dos servizos públicos, e a remunicipalización dos servizos agora privatizados (auga, recollida de lixo, dependencia, apoio familiar, menores...) é fundamental para poder exercer dereitos fundamentais, asegurar a igualdade no seu aceso e optimizar recursos. O TTIP vai significar a privatización dos servizos públicos para seguir converténdoos en niño de negocio das grandes empresas.
Na Marea Ártabra entendemos que o dereito á saúde de todas e todos, debe ser un eixe vertebrador das políticas municipais. O TTIP vai representar a quebra constante dese dereito, non só pola privatización da sanidade, senón pola desregularización do comercio de produtos tranxénicos, a legalización de sustancias non autorizadas ata agora para uso alimentario, o levantamento da cláusula de prevención, e a distribución e control de fármacos.
Na Marea Ártabra queremos recuperar o concello para as veciñas e veciños, para que exerzamos nel a soberanía, con responsabilidades e dereitos. O TTIP vai colocar ás multinacionais por riba da soberanía dos estados, de maneira que calquera conflito entre unha destas grandes empresas e os gobernos europeos, vaise resolver ante entidades de mediación privadas. As normativas laborais, o salario mínimo, a normativa sobre produtos financeiros... vanse adaptar á baixa, collendo de Europa ou de EE.UU., aquelas normativas que máis favorezan aos intereses das grandes empresas.
A cidadanía de Ferrol ten que tomar conciencia urxentemente, da necesidade de participación e de resposta colectiva e organizada, para enfrontar todos estes plans que desde os poderes económicos, collidos da man do poder político, están intentando impoñernos.
Marea Ártabra estará o sábado 18 de abril mobilizándose na praza do concello de Ferrol, ás 12:30hs, na concentración convocada pola Plataforma Ferrolá contra o TTIP, para unirse ao clamor europeo contra esta ameaza.
A A.VV. de Caranza, leva tempo cunha acción veciñal ao servizo do Partido Popular. Ten-nos acostumad@s a propostas moi reaccionarias e só se dedican a pasear-se cos concelleir@s de quenda, para xustificar a súa inoperancia, apego ao cargo e clientelismo a máis non poder. Unha asociación veciñal que non representa os intereses da veciñanza do barrio, mais preocupada polos intereses do partido que goberna hoxe no Concello de Ferrol, con José Manuel Rey Varela como Alcalde.
Nos últimos días centos de veciñ@s xunto con varias asociacións do barrio mobilizaron-se para denunciar ao Concello de Ferrol, polo abandono ao que está sometido o Mercado Municipal. A citada asociación veciñal que non é digna de levar o nome de "Cuco Ruíz de Cortazar", é cómplice deste abandono. Moitas veciñas e veciños, amosan o rexeitamento ante a actitude de comandita entre dirixentes veciñais da citada asociación e os dereitistas membros do goberno municipal. Actuan como se foxen os vicerreis do barrio, por exemplo nos últimos meses dando permisos para utilizar prazas públicas como estacionamentos (caso inauguración do Auditorio); a tala de ducias de árbores porque supostamente molesta a algún veciñ@; a colocación de boloardos sen contar coa veciñanza; encher de terra sen prensar a explanada da traseira do Mercado, sen proxecto, nen seguridade, que tivo que denunciar o Colexio Público do barrio, polo perigo que corrían as crianzas, polo transito continuado de camións, ..., unha obra que carecia do letreiro correspondente co número de licencia e nome de quen a facia. E xa non falemos do acordo coa dereita para enterrar a participación cidadá e os orzamentos participativos. Favor que aínda lles debe o Sr. Vilariño (actual Presidente da Autoridade Portuaria) e daquela Concelleiro de "Participación" Cidadá.
Destacados directivos desta asociación veciñal, non soportan que haxa vida social no barrio que eles non autoricen. É por iso que todo o que escape ao seu control hai que destruír-lo e agora dan-se conta que hai veciñanza que está disposta a defender o seu Mercado Municipal, fronte a especulación e o abandono. Mobilizacións e denuncias que cuestionan o seu poder e ideoloxía caciquil. Non o poden permitir.
Agora inventan-se denuncias de veciñ@s contra a Horta Comunitaria de Caranza (os denunciantes son eles mesmos claro). A quen lle facían dano un grupo de parad@s que hai dous anos decidiron traballar unhas parcelas desocupadas e poñelas a producir de xeito ecolóxico? Que fácil é ir a polo máis débil!
Pecharom a minha rua. Os sinais e as barreiras cortam a Avenida do Mar
em Caranza. O passeio segue acolhendo os passos de moita gente que busca
neste caminho a paisagem, a tranquilidade, a brisa e também as sombras
dos prádios que abeiram longos tramos deste caminho ao pé da Ria. Umha
ria castigada durante tantos anos pola inconsciência das administraçons e
a falta de compromisso da cidadania para preservar e defender o
território que habita.
Manhá começa a desfeita. Um bom número dessas companheiras de passeio
vam ser sacrificadas para a construçom dum tanque de tormentas. Umha
obra obsoleta, que em pouco tempo quedará fora da legislaçom europeia.
Europa vai proibir este tipo de saneamento que mistura augas pluviais
com augas residuais.
Estas companheiras nada podem aguardar das instituiçons que apuram estas
obras num caminho cara nengures para encher este bairro de
infraestruturas fantasmas, inecessárias, perigosas ou obsoletas
(depósito de propano, linhas aéreas de alta tensom, auditório municipal,
“tanques de tormentas”, ...). Tampouco podem aguardar nada dumha
associaçom vizinhal, a AAVV de Caranza, que devera representar os
interesses do bairro, incluindo vizinhos e vizinhas e defensa do
território, totalmente alinhada coas decisons das instituçons que
promovem este modelo irracional e destrutivo para o território. E nós, o
resto de habitantes deste bairro, também daremos as costas, nem estamos
nem se nos aguarda.
Só quedaram as perguntas das crianças. Ante os seus olhos as árvores
derribadas. E nós que nom poderemos dizer que foi para beneficio da Ria,
que foi para benefício da comunidade..., só poderemos explicar e
escusar-nos “fam-no para ganhar dinheiro, e nom pudemos fazer nada”.
Co obxectivo de presentar e debater o proxecto de rehabilitación do mercado municipal, que saíu das xornadas comunitarias desenvolvidas ao longo destes meses; de enquisas realizadas aos veciños e veciñas, e operadores/as do mercado, cinco asociacións do barrio convocan unha asemblea para este venres 14 de Setembro ás 7 da tarde, no Centro Cívico de Caranza.
As xornadas comunitarias estiveron apoiadas e asesoradas polo Colexio de Arquitectos e a Asociación de Operadores do Mercado. Agora trátase de celebrar unha asemblea para dar a coñecer e debater ese proxecto aos veciños e veciñas interesadas, antes de presentalo á institución municipal.
Estas asociacións cren que, despois de case 30 anos sen mantemento, e sen máis alternativas á vista, rehabilitar hoxe o mercado é a última oportunidade de salvar e ampliar a maior actividade económica do barrio, e un servizo necesario orientado ao consumo de proximidade.
As liñas xerais desta proposta de rehabilitación do mercado, están definidas nos seguintes obxectivos:
- A recuperación como espazo público do terreo traseiro do mercado, hoxe abandonado, como espazo público, con uso de parque e campo da festa.
- A integración deste espazo coas parcelas do Centro de Saúde e o Instituto Carvalho Calero, eliminando as actuais barreiras que os separan.
- A apertura dun gran oco no mercado, en toda a súa altura, que dé entrada directa a este espazo dende a Avda de Castelao.
- Espazo adicado ao mercado, máis pequeno co actual (con menos postos, e agrupados na primeira planta)
- Manter os locais comerciais que dan á rúa Castelao.
- Un espazo para actividades socio-culturais, en planta baixa, que se poida abrir totalmente ao xardín traseiro.
- Un espazo para actividades socio-culturais, en planta alta.
Convocan esta asemblea: ANPA IES Carvalho Calero; ANPA CEIP Manuel Masdias; Asc. Cultural Fuco Buxán; Asc. Sociocultural López Bouza; Colec. Sociocultural A Revolta de Trasancos
Este Martes 21 de Agosto foi a cuarta xornada na Horta Comunitaria de Caranza. Desde as 6 da Tarde até pasadas as 9 da noite. Preparando a terra, cavando en profundidade e unha capa espesa de palla e herba, para facer unha cama baixo terra. A terra necesita mover-se despois de máis de trinta anos, logo poñer unha cama que garde un pouco de humidade cando se regue ou chova, onde podan ir as raíces. O vindeiro luns 27 de Agosto, nova xornada, mais desta vez @s comuner@s teñen previsto ir até as hortas comunitarias de Canido.
III Xornada de Traballo na Horta Comunitaria de Caranza
O pasado Xoves 16 de Agosto de 2012, tiña lugar desde as 6 da tarde a terceira xornada de traballo na Horta Comunitaria de Caranza. Esta horta está promovida pola Asemblea de Desempregados da CIG, mais nela participan voluntaria mente quen quixer desenvolver este traballo comunitario. Polo de agora na horta participan dez comuner@s que están traballado en labouras de preparación da terra e probas de plantación.
Despois de tres horas de traballo comunitario, tivo lugar a Asemblea onde se falou dos traballo realizados, dos pasos futuros e da vindeira convocatoria de acción comunitaria que vai ter lugar o vindeiro Martes 21 de Agosto ás 6 da Tarde.
Realizada a segunda xornada de traballo na horta comunitaria de Caranza promovida pola Asemblea de Desempregad@s da CIG. Este xoves 9 de Agosto de 2012, nesta segunda xornada foi-se conformando un grupo de traballo comunitario que contiunua na plantación de hortalizas e preparación das bancadas de traballo. O pasado 3 de Agosto, na primeira xornada, comezaran os primeiros traballos comunitarios na horta que vai collendo forma.
Non fai falta estar afiliado á CIG para participar nesta Horta Comunitaria, toda persoa desempregada ou con emprego en precario (a tempo parcial, contratos curtos, pensionistas con prestacións baixas,
..), poden achegar-se até as inmediacións da rúa Cartaxena, no Paseo
Marítimo de Caranza, onde hai 5.353 m2 actos para o cultivo.
Reportaxe de Montse Mayoral publicado no 'Diario de Ferrol'
Todos poñen por diante “sen emprego, si, pero non parado”. E é que ademais de saír cada día á rúa a buscar traballo hai que loitar contra un estado de ánimo que ameaza con aniquilalos. Así, xa son uns cantos os que decidiron, sen patrón, contrato nin soldo, poñerse ao choio.
Autobautizados como “@s cidadáns”, un grupo de ferroláns sen emprego e outros en activo decidiron dedicar o seu tempo a mellorar a súa contorna. A súa primeira acción cívica foi ir rozar e limpar a contorna da antiga mina de ouro de Ponzos, unha tarefa que comezaron no fin de semana do 21 de xullo e que culminaron onte, deixando constancia da intervención cun particular “cartel de obra” no que consta que a intervención “non foi financiada polo PP”.
A “@s cidadáns” móvelles un espírito de rebeldía contra o mal funcionamento das administracións, en particular o Concello. Na súa declaración de intencións, de feito, fan constar que coa súa actividade queren denunciar o mal estado no que se atopan os espazos públicos, as zonas verdes, as estradas... e a ineficacia das empresas contratadas para o seu mantemento, no seu caso. De feito, no blogue do grupo recóllense outros exemplos de como os cidadáns suplen estes servizos, como o recente caso dunha octogenaria que se puxo a rozar unha estrada de Covas.
Ademais, o grupo declárase contrario á obra que o Concello de Ferrol vai executar para transformar a Praza de España “por innecesaria e de malgasto”. O grupo “@s cidadáns” queren que os 700.000 euros destinados a devandito proxecto se utilicen para contratar desempregados e a creación de cuadrillas para reparar, limpar e manter a cidade. “Reivindicar traballando que queremos traballar” é outro dos principios que os move e que, segundo anuncian, continuará sacándoos á rúa en próximas accións.
As portas de “@s cidadáns” están abertas para todo o que queira colaborar, como sucede coa Asemblea de Desempregados da CIG. O seu primeiro impulso foi contribuír a facer visible a lacra do desemprego, un problema que ás veces só vemos en cifras, e clamar por que a sociedade non os vexa como “parados”, un cliché do que queren escapar custe o que custe.
Esta mesma semana puxeron en marcha a que podería considerarse a súa primeira acción cívica en Ferrol. Trátase de cultivar unha horta comunitaria no paseo marítimo de Caranza, unha zona na que hai amplos terreos aptos para iso e que a miúdo están faltos de mantemento. “Recuperar ou ánimo do traballo, aprender unha profesión, axudar na casa con produtos de horta básicos e agrupar á xente para emprender mobilizacións de face a visualizar ou problema do desemprego”, explican os promotores. Do mesmo xeito que “@s cidadáns”, a Asemblea de Desempregad@s ve a cantidade de traballo que hai por facer na súa cidade e reclama ao Concello que cre cuadrillas e contribúa, con iso, a paliar dous problemas.
Este venres pola tarde tivo lugar a primeira reunión de traballo para poñer en marcha a horta en Caranza.
@s desempregad@s que o impulsan convidan a sumarse á iniciativa a quen o desexe e particularmente solicitan a axuda de persoas maiores que poidan guialos á hora de organizar os seus cultivos.
II Xornadas Comunitarias "Estamos proxectando o Mercado de Caranza", trae a túa idea - 30 de Xuño 1ª Sesión; 14 de Xullo 2ª Sesión e 28 de Xullo 3ª Sesión
O sábado 19 de Maio, celebrabamos a primeira Xornada Comunitaria sobre o
Mercado de Caranza, foi a primeira cita para, dentro das propias
instalacións do Mercado Municipal, celebrar unha primeira xornada
comunitaria para a posta en valor do mercado e comezar a criar
colectivamente o proxecto da súa recuperación, foi o primeiro obxectivo
que nos marcamos. Desde aquela continuamos, as cinco asociacións do
barrio, coa intención de seguir co proxecto comunitario de incentivar e
dinamizar a participación veciñal nos problemas que nos preocupan e as
necesidades colectivas do barrio. Consideramos no seu momento que o
Mercado, a propia edificación depauperada e o espazo que o rodea, en
especial a traseira totalmente infrautilizada e abandonada, merecían
outro tratamento por parte das autoridades municipais e a propia
veciñanza. E niso estamos.
A esa primeira Xornada, continuaron reunión e debates, recollida de
información e reflexión sobre o a mesma. Fixemos unha enquisa a
comerciantes; e as operadoras e opreradores do Mercado, da cal temos
unha análise que debatiremos na primeira sesión deste Sábado 30 de Xuño.
Estas Segundas Xornadas que veñen, divididas en tres sesións que
realizaremos os días 30 deste mes e os 14 e 28 do mes de Xullo, teñen o
obxectivo de elaborar un anteproxecto no espazo público e un programa de
intervención no Mercado, coa intención de presentar-llo ao Concello.
Veciña, veciño, persoa interesada no traballo comunitario de calquera
barrio ou lugar, pode participar nestas xornadas que facemos con vontade
construtiva, transformadora e coa participación cidadá.
Un obradoiro aberto (sen inscripción previa), mínimo 3 xornadas: 30 de xuño, 14 de xullo e 28 de xullo.
Obxectivos xerais:
Elaborar un anteproxecto de intervención no espazo público.
Elaborar un programa de intervención no mercado.
(para presentarlle ao concello)
Sesión 1: día 30 de xuño
Obxectivos:
Presentación do obradoiro
Introducción á participación veciñal no urbanismo
Acordo sobre programa do mercado.
Programa
11.00 Presentación
11.15 Exposición doutras experiencias de proxectos participados.
12.00 Formación de equipas de traballo e entrega do material.
12.15 Traballo en grupo. Análise das enquisas, propostas do grupo e
conclusión de grupo. (1 proposta prioritaria e 2 non prioritarias)
12.45 Presentación e defensa das conclusións das equipas. Banco de propostas.
13.15 Discusión do banco de propostas. Acordo sobre programa de usos.
13.45 Conclusións.
14.00 Remate.
Materiais necesarios:
Pequeno dossier dando información sobre o mercado e o seu uso
Actual (1 por grupo)
Resume resultados das enquisas.
Presentación en powerpoint (automática) para explicar exemplos
De participación veciñal en urbanismo.
Material de debuxo.
pos-its.
Sesión 2: día 14 de xullo
Obxectivos:
Acordo sobre programa do espazo público.
Programa:
11.00 Formación de equipas de traballo e entrega de materiais
11.15 Traballo en grupo. Análise das enquisas. Propostas do grupo e
conclusión de grupo. (1 proposta prioritaria e 2 non prioritarias)
12.00 Presentación e defensa das conclusións das equipas. Banco de propostas.
12.30 Discusión do banco de propostas. Acordo.
13.15 Conclusións. Documento de programa para o mercado.
13.30 Remate.
Materiais necesarios:
Pequeno dossier dando información sobre o espazo (1 por grupo).
Planos do espazo público.
Material de debuxo.
pos-its.
Sesión 3: día 28 de xullo
Obxectivos: Anteproxecto do espazo público.
Programa:
11.00 Formación de equipas de traballo e entrega de materiais.
11.15 Traballo en grupo. Propostas do grupo e conclusión de grupo. (1 proposta prioritaria e 2 non prioritarias)
12.00 Presentación e defensa das conclusións das equipas. Banco de propostas.
12.30 Discusión do banco de propostas. Acordo.
13.15 Conclusións. Documento de programa para o espazo público.
13.30 Remate.
Materiais necesarios:
Documento do acordo de programa de intervención no espazo público.
Desde primeira hora do sábado a actividade do mercado de Caranza, desenvolvíase dun xeito especial. Moitas das grises persianas de ferro, que manteñen fechados máis do 80% dos postos, aparecían cubertas de cores, de debuxos infantís co colorido alegre que os caracteriza, e de propostas, moitas propostas para converter unha das zonas máis deterioradas do barrio, nun espazo útil, dinámico e con valor para a comunidade.
Cinco asociacións de Caranza, a ANPA do IES Carvalho Calero, a ANPA do CEIP Manuel Masdias, a Asociación Cultural Fuco Buxán, a Asociación Sociocultural López Bouza e o Colectivo Sociocultural A Revolta de Trasancos, teñen trazado un camiño común para a posta en valor dun barrio que precisa dunha intervención comunitaria para mellorar a calidade de vida das persoas que o habitan.
O mercado de Caranza simboliza esa necesidade do barrio de reconstrución e rehabilitación. O abandono institucional que ven sufrindo este edificio público e o espazo que o circunda, decidiu a este grupo de asociacións a centrar a súa intervención comunitaria nel. Para iso contaron e contan co asesoramento e colaboración da delegación ferrolán do Colexio de Arquitectos de Galicia e da Asociación de Vendedoras e Vendedores do Mercado de Caranza.
Comezouse por realizar enquisas entre a veciñanza para recoller a súa opinión sobre a situación do mercado e coñecer as propostas e solucións que poden aportar.
Desde os centros públicos do barrio realizáronse visitas e traballos escolares sobre o mercado, animando á creación de ideas e solucións para este espazo público.
O sábado 19 foi a primeira cita para, dentro das propias instalacións do mercado, celebrar unha primeira xornada comunitaria para a posta en valor do mercado e comezar a criar colectivamente o proxecto da súa recuperación.
Unha das paredes do mercado proxectou imaxes de informativos onde os operadores e operadoras do mercado denunciaron en repetidas ocasións as condicións nas que teñen que desenvolver o seu traballo. Como contrapunto imaxes doutros mercados galegos, mostraban o que podería chegar a ser o noso.
A continuación, nun improvisado espazo entre dos postos de venda de froitas e verduras, Toni García, arquitecto, explicaba como barrios semellantes ao nosos en Europa, comezaron o camiño da rehabilitación con participación comunitaria hai xa varios anos. Explicou tamén como a arquitectura cambiou o camiño que tiña trazado até o século pasado, un camiño que comezaba por pensar os edificios, para ocupar espazos e posibilitar a vida. Agora o camiño recorrese á inversa, pensamos a vida e os espazos para decidir o tipo de edificio.
O arquitecto Miguel Raimúndez, encargouse da visita guiada polas instalacións do mercado, para ver, tanto os problemas derivados do paso do tempo e da falta de mantemento; aqueles problemas derivados dunha construción onde non se resolveron ben algúns problemas de permeabilidade; ou aqueles outros que se derivaron de aplicar unha mala solución para os primeiros. Entrada de luz, ventilación, filtracións, evacuación de augas, cubertas... e unha viga exterior que precisa, xunto a esquina leste da cuberta, unha intervención urxente para evitar máis deterioro.
No espazo situado detrás do mercado improvisouse unha pequena asemblea onde se nos explicou as características das dúas parcelas que o conforman. Unha Casa da Mocidade, unha praza pública para celebrar as festas e o feirón, un espazo para o lecer e a convivencia... foron algunhas das ideas que comezaron a encher aquel espazo de soños que están chamados a converterse, na realidade dun barrio que desperta a unha nova etapa de construción comunitaria.
O acto nos medios:
Defenden a rehabilitación fronte á derriba nunha xornada sobre o mercado de Caranza [Ir ao xornal: Diario de Ferrol - 20.05.2012]
Saíu na Portada do Diario de Ferrol na edición impresa do Domingo 20 de Maio de 2012 [Acceder]
Cinco entidades de Caranza organizan unha xornada en torno ao mercado do barrio [Ir ao xornal: Diario de Ferrol - 17.05.2012]
Ferrol | Cinco asociacións de Caranza organizan unha xornada sobre o mercado do barrio | A cita é o sábado na propia praza de abastos [Ir ao xornal: La Voz de Galicia - 16.05.2012]
Enlaces de interese:
Blogues con información das actividades conxuntas das Asociacións do Barrio de Caranza - Ferrol.
No meu bairro, hoje houvo umha assembleia. Foi às sete da tarde, convocada por oito associaçons. Falamos, participamos, debatemos, propusemos … Logo assistimos a um ato convocado polo Concelho, onde se proibiu falar, participar, debater, eleger e ser elegid@ … Onde os atuais representantes da Asociación de Veciños de Caranza, traicioarom acordos contraídos com outras sete associaçons do bairro. Isto permitiu agrilhoar o que tinha que ser a “Asemblea de Barrio” e reduzi-la a um mero trámite ao serviço das políticas do PP. Um bo dia para a mentira, a manipulaçom, a ambiçom pessoal..., mas também um bo día para a verdade, a participaçom direta e a defesa do bem comum. Porque na Assembleia, a única Assembleia, que merece tal nome, que se desenvolveu no bairro às sete da tarde de hoje, impulsou-se um novo processo de participaçom, de construçom do bairro desde o trabalho comunitário, desde a reivindicaçom popular. É por isso que ao render o meu corpo esta noite nesta casinha fronte à ribeira, conseguida tras anos de loita comunitária, tenho um sentimento de esperança, porque a boa gente, a generosa e loitadora gente de Caranza, vai saber virar a mentira e a manipulaçom, em verdade, justiça e qualidade de vida para o bairro.
[*] Por Lupe Ces Rioboo -Caranza Ferrol 1953, é mestra, activista social, integrante da Marcha Mundial das Mulleres. Forma parte do Colectivo Ártabra 21.
Es Martes 21 de Decembro, ás 8 da Tarde, proxectara-se no Centro Cívico e Cultural de Caranza: "O Segredo da Frouxeira" -Unha historia reveladora dun descubrimento transcendental. Este é un acto organizado pòla Asociación Veciñal de Caranza "Cuco Ruíz de Cortazar" .
O documentario será presentado polo seu Director, Xosé Abad Vidal, e pola pesidenta da asociación veciñal, Mª Pilar R.Venancio.
Este é un documentario que pretende recuperar a memoria histórica rendendo homenaxe aos represaliados e ás súas familias,narra a historia de Alejandro Porto Leis, o último alcalde republicano de Serantes, e a de Modesto del Río Polo, Jesús Miño Loureiro e Avelino Landeira Maneiros, “paseados” xunto a él, por haberlle axudado a ocultarse ao comezo da Guerra Civil.
Está dirixido por Xosé Abad Vidal e conta co apoio, entre outros, de TVG, Consellería de Cultura do anterior Goberno galego, Concello de Ferrol, A.C. “Fuco Buxán”, Asoc. Memoria Histórica Democrática e Fundación 10 de Marzo e EAF Produccións.
Participan nel, en aspectos de investigación, asesoramento ou figuración, numerosas persoas relacionadas coa A.C. “fuco buxán” e cos grupos de teatro afeccionado de Ferrol.
ACTO NA ASOCIACIÓN VECIÑAL DE CARANZA Centro Cívico e Cultural
Organizado pola Asociación Veciñal de Caranza, coa colaboración da A.C.“Fuco Buxán”, o vindeiro Venres, 16 de Xullo de 2010, ás 8 da Tarde, no Salón de Actos do Centro Cívico e Cultural de Caranza, proxetara-se o documentario: “O Segredo da Frouxeira” (Unha historia reveladora dun descubrimento transcendental).
Presentan o Acto: Xosé Abad (Director do documental) e Mª Pilar R. Venancio (Presidenta da A.VV. Caranza)
Esta documental que pretende recuperar a memoria histórica rendendo homenaxe aos represaliados e ás súas familias, narra a historia de Alejandro Porto Leis, o último alcalde republicano de Serantes, e a de Modesto del Río Polo, Jesús Miño Loureiro e Avelino Landeira Maneiros, “paseados” xunto a él, por haberlle axudado a ocultarse ao comezo da Guerra Civil.
Está dirixido por Xosé Abad Vidal e conta co apoio, entre outros, de TVG, Consellería de Cultura do anterior Goberno galego, Concello de Ferrol, A.C. “Fuco Buxán”, Asoc. Memoria Histórica Democrática e Fundación 10 de Marzo.
Asociación de Vecin@s de Caranza " Cuco Ruiz de Cortazar"
Centro Cívico de Caranza 2º Planta Apartado de Correos 1045
Avda. de Castelao s/n
15.406 FERROL (A Coruña)
Representantes da comunidade educativa do Colexio Público "Masdias" de Caranza pechan-se no Pazo Municipal do Concello de Ferrol
A Comunidade educativa do Manuel Masdias sigue intentando que a Consellaría de Educación dé solución aos problemas que impiden que o curso 2009-2010, se estexa desenvolvendo coa normalidade necesaria.
Son moitas as iniciativas que esta comunidade leva desenvolvendo para solicitar unha saída para as súas reivindicacións. As características do alumnado, sobre todo a incorporación de alumnado que ven doutros centros, impide unha mínima atención educativa dado que non se conta co profesorado necesario para atender as necesidades educativas especiais que prantexa o claustro, a dirección e a ANPA.
Até o momento a delegación territorial só concedeu unha mestra interina ao 50% da xornada lectiva. Os encerros no centro, as marchas a pé das familias até a delegación de Ferrol, ou a viaxe á delegación territorial d'A Coruña, non conseguiron alertar da urxencia de dotar convenientemente este centro por parte do Conselleiro Jesús Vázquez. Esto motivou unha nova mobilización por parte das familias e profesorado, nesta ocasión cun encerro na casa consistorial de Ferrol. A alcaldia anunciou o apoio às reivindicacións desta comunidade educativa. Apoio, ao que se agarda se sumen distintas organizacións políticas e sociais da comarca, coñecedoras do labor educativo que se ven realizando no barrio, sendo o único centro público que imparte educación infantil e primaria, sobrevivindo a unha importante competencia por parte dos centros privados concertados, de confesión católica.
Mentras se fai ver a través dos medios de comunicación, que o alumnado dos centros educativos perde interese e respeto polo traballo do profesorado, os sectores sociais máis desfavorecidos ven vulnerado o dereito básico a unha educación de calidade, que no centro Manuel Masdias pasa por conseguir o profesorado de apoio que se precisa. A figura do mestre ou mestra, queda así vinculada unha vez máis ás necesidades básicas da infancia. Que esta reivindicación básica non sexa atendida, só pode vincularse con un retroceso social en canto á escolarización universal de todos os nenos e nenas, independentemente da súa orixe económica, etnia, relixión ou condicións de saúde física ou mental.
Nota.- Fotos da web de RadioFusión
________________________
Ferrol a 5 de maio de 2009.- Desde a comunidade escolar/A.N.P.A do C.E.I.P Manuel Masdías de Caranza queremos facer público o noso malestar e enfado pola situación de abandono que padecemos ao respecto da situación na que se atopan as instalacións e a inexistencia de parque infantil para os nenos e nenas de infantil desde comezo do curso. Queremos poñer de manifesto a desidia con que está a actuar o Concello ao respecto do único colexio público co que conta o barrio de Caranza.
Foi polo 23 de xaneiro cando sufrimos o paso do Klaus, e xa van máis de 2 meses sen que se proceda ó arranxo da cuberta e laterais do pavillón do colexio. Como consecuencia daquilo, estamos soportando as situacións de risco que isto comporta para os nosos nenos e nenas. Debemos ter en conta que é no pavillón onde coinciden os case 150 nenos e nenas do colexio á hora do recreo, onde se desenvolven as actividades extraescolares e onde se fai a ximnasia e psicomotricidade. Pois ben, é cando chove ou con mal tempo (algo que acontece con máis frecuencia do que parece que algúns pensan, porque estamos en Galicia e non en Marbella)cando os máis pequenos(3, 4 e 5 anos)se ven obrigados a pasar ao salón de actos a visualizar vídeos e o resto dos nenos e nenas xogan no pavillón “esquivando” pozas, pingueiras e pilas de excrementos que as pombas, gaivotas e demais paxaros van deixando por todo o pavillón, e iso sen mencionar as correntes de vento e frío que teñen que soportar.
Pero as opcións e recursos son poucos, e sobre todo nos colexios públicos: foi no primeiro día de curso cando chegaron un par de obreiros do concello e desmantelaron o parque infantil do que dispoñían os máis pequenos do colexio, ao parecer non cumpría coa normativa e o concello non quería correr riscos de cara a que acontecese algo- infraestrutura, por outra banda, coa que contan todos os colexios para intentar que nos recreos maiores e pequenos teñen o seu espazo no tempo de lecer- . Pois ben, a día hoxe e despois de 6 meses de curso aínda non temos o parque infantil.
Dicir tamén que na entrevista que se mantivo coa responsábel da área de educación no concello, a única resposta foi que non había orzamento e que as obras do pavillón estaban “nunha mesa de contratación”.
O pasado mércores 29 de abril acudimos ao pleno coas nosas reivindicacións e a contestación da responsábel da área de educación é: que non existe orzamento para dotar ao noso colexio dun parque e que irá na primeira remesa que se faga para este tipo de infraestrutura -polo que aínda non sabemos cando se fai facer o parque- e qué as obras do pavillón estaban pendentes de adxudicación. O alcalde pola súa banda comprometeuse a qué as obras do pavillón contaran coa máxima prioridade e que na vindeira semana visitarían uns técnicos o colexio (nos sabemos moi ben para qué, xa que estiveron no colexio noutras ocasións) e qué manteríamos unha reunión para falarmos do tema e para esclarecer calquera tipo de dúbida ou ao respecto das obras a facer no C.E.I.P Manuel Masdías e con ese compromiso nós abandonamos o pleno. Como nada disto se materializou e xa estamos a martes 5 de maio, queremos comunicar que desde a comunidade escolar do Masdías imos continuar coas movilizacións.
Mañá mércores 6 de maio ás 18:30 horas da tarde procederemos a facer un corte de tráfico na rotonda do Conservatorio de Música no barrio de Caranza.
COMUNIDADE ESCOLAR DO CEIP MANUEL MASDÍAS ____________________
De: Asociación Veciñal de Caranza -avvcaranza@mundo-r.com-
Para: artabra21@gmail.com
Data: 4 de setembro de 2008 15:32
Asunto: A Asociación de veciñ@s de Caranza forma parte desde hoxe da Plataforma Cidadá en defensa do Cabo Gago
A Asociación de veciñ@s de Caranza forma parte desde hoxe da Plataforma Cidadá en defensa do Cabo Gago, móstrase a disposición da familia para canto consideren oportuno e anima aos veciñ@s de Caranza e de toda a cidade a participar na manifestación do día 11 ás 20:00 hrs para defender a liberdade de expresión e a xustiza,"é importante concienciar aos cidadáns de que Jorge Miguel Gago evitou co seu bo facer profesional e a súa rápida reacción unha catástrofe que puido afectar a unha parte da poboación e ademais convencido de que a vida de seres humanos está por encima de calquera disciplina deu un claro exemplo de civismo digno non de castigar con carcel senón de tomar como bo exemplo".
Fdo. Pilar rodríguez Venancio
Presidenta
_____________ Asociación de Vecin@s de Caranza " Cuco Ruiz de Cortazar"
Centro Cívico de Caranza 2º Planta Apartado de Correos 1045
Avda. de Castelao s/n
15.406 FERROL (A Coruña)