Amosando publicacións coa etiqueta Lingua. Amosar todas as publicacións
Amosando publicacións coa etiqueta Lingua. Amosar todas as publicacións

martes, maio 17, 2022

En galego agora e sempre, ... Por Celso Posada Fernández


Neste 17 de Maio Día das Letras Galegas volvemos de novo a saír as rúas moitas cidades, vilas e pobos do noso país Galiza e por enriba de todo as rúas de Santiago de Compostela, pra participar nunha grande Manifestación convocada pola plataforma social Queremos Galego  con saída as 12:00 da Alameda.

A Plataforma Queremos Galego é unha plataforma cidadá, conformada por máis de 500 entidades sociais e culturais do país así como por persoas a título individual, que nace da vontade de articular unha ampla resposta colectiva a prol da lingua propia do noso pobo, o galego; de defensa e afirmación dos usos públicos e dereitos lingüísticos xa garantidos pola actual lexislación; de progresiva normalización naqueles espazos onde o idioma de noso non goza aínda da presenza desexada.

Volvemos de novo a saír as rúas de Galiza pra dicir que queremos vivir os 365 días do ano en galego, pra denunciar o ataque e agresión constante do goberno da Xunta de Galicia do PP a nosa lingua e porque cremos que un novo futuro é posíbel e necesario pra nosa lingua. 

A lingua galega une e  é o principal elemento de cohesión, identidade e progreso de Galiza.

Un futuro novo para o noso idioma é posíbel, como demostran os centos de colectivos que actúan día a día para garantir o futuro de Galiza e do seu idioma; as miles de persoas que reclaman atención en galego ou respecto pola legalidade na toponimia e que vencen as dificultades e se propoñen falar galego sempre; as familias que se esforzan en transmitir a lingua malia non poderen contar con espazos fundamentais como o ensino, os xoguetes, deseños animados e toda a oferta imprescindíbel que lle é negada ao galego; ou como tamén demostran os concellos de todas as cores que se organizan para promoveren conxuntamente a normalización lingüística a nivel local.

Porén, toda esta mobilización colectiva precisa do acompañamento e do esforzo das institucións e poderes públicos, que ademais da obriga moral de defenderen os nosos intereses colectivos teñen a obriga legal de promoveren e garantiren a posibilidade de uso do galego en todo e para todo: garantindo o galego como lingua vehicular no ensino en todas as materias e etapas e nas actividades extraescolares, o seu uso en toda a administración, na xustiza, nas empresas; a súa dispoñibilidade no audiovisual tanto con producións galegas como a través da dobraxe e lendaxe. Precisamos xa un goberno que actúe en todos os ámbitos e contribúa xunto á sociedade a darlle un novo futuro á lingua, para podermos vivir en galego agora e sempre.

Como dicía o escritor, intelectual galego Castelao: Se aínda somos galeg@s é por obra e gracia do idioma.

[*] Celso Posada Fernández, nado en Ferrol o 16 de Xullo de 1980. É un activista en diferentes movementos sociais de Ferrolterra. Militante do BNG e a UPG. Diplomado en Maxisterio de Educación Primaria pola Universidade da Coruña e Monitor de Tempo Libre.| No Facebook. | En Twitter. | Artigos en: Nós Diario, Diario de Ferrol, Galicia Confidencial, Ferrol 360, GalizaLivre, Praza Pública, El Comunista e Ártabra 21.

Enviado por:
celso posada
-celsoposada2006@hotmail.com-
16 de maio de 2022 10:5

_______

domingo, maio 08, 2022

Queremos Galego convida a manifestarse o 17 de maio en Compostela 'En galego agora e sempre: por un novo futuro para a lingua' - A plataforma cidadá, composta por máis de 500 entidades sociais e culturais do país, convoca a sociedade a manifestarse o 17 de maio ás 12h entre a Alameda e a Praza da Quitana - Autobuses desde as comarcas



A plataforma cidadá, composta por máis de 500 entidades sociais e culturais do país, convoca a sociedade a manifestarse o 17 de maio ás 12h entre a Alameda e a Praza da Quitana baixo o lema “En galego agora e sempre. Por un novo futuro para a lingua

Representantes da xestora da plataforma cidadá Queremos Galego, da que forman parte máis de 500 entidades sociais e culturais do país, anunciaron esta mañá, acompañados por representantes do audiovisual galego, que o 17 de maio sairán ás rúas de Compostela para “evidenciar que a situación do galego non é irreversível” e “que hai alternativas e vontade colectiva para mudar a tendencia negativa para a lingua”. Haberá transporte dende todas as comarcas galegas, para facilitar o desprazamento. A información dos puntos de saída estará dispoñíbel na web queremosgalego.gal.

O voceiro de Queremos Galego, Marcos Maceira, recordou na presentación que todos os avances para o galego se conseguiron “pola perseverancia e polo esforzo do pobo galego”, como a incorporación do galego ao catálogo de Netflix ou a recente sentenza do TSXG contra Facenda por atacar os dereitos lingüísticos dun cidadán galego. Maceira advertiu que “a sociedade galega está soa, sen institucións que a amparen na defensa da lingua” e salientou que “é hora de que isto mude e os poderes públicos, comezando polo novo presidente da Xunta, abandonen a súa política de agresión sistemática ao galego e comecen a exercer a súa responsabilidade na defensa dos intereses de Galiza e da súa lingua”.

A plataforma reclama a posibilidade de vivir “en galego agora e sempre” e denuncia que o ensino e unha limitadísima oferta audiovisual en galego botan abaixo os esforzos das familias por garantiren a transmisión da lingua. A sociedade galega propón solucións, como a Iniciativa Xabarín, a Iniciativa polo audiovisual galego ou as bases para a normalización da lingua elaboradas pola maioría da representación sindical do profesorado, das anpas, dos movementos de renovación pedagóxica e pola Mesa, pero dende Queremos Galego recordan que para que que estas solucións frutifiquen cómpre que os gobernos galego e español abandonen o desprezo pola lingua galega e garantan a súa presenza e dispoñibilidade “en todo e para todo”.

Mesmo os pequenos pasos que como pobo conseguimos para o noso idioma están sometidos a revisións constantes”, advertiu Maceira. “Só hai que ver como despois da ampla campaña social e da unanimidade política acadada arredor da iniciativa Xabarín”, recordou, “o debate no Congreso pode acabar limitando os avances en horas e cotas de emisión a unha soa das linguas cooficiais”. “É unha vergoña que non imos permitir que o recoñecemento da pluralidade lingüística no audiovisual, onde Galiza foi quen levou o maior peso na iniciativa social, poida rematar por excluír precisamente o galego”, rematou.

Un novo futuro para o galego é posíbel, se todas e todos, cidadanía, entidades sociais e gobernos imos na mesma dirección, a de asegurar que o galego está presente e plenamente dispoñíbel. A lingua galega une é o principal elemento de cohesión, identidade e progreso de Galiza. O 17 de maio manifestarémonos en Santiago para que a Xunta de Galiza comece a actuar en consecuencia.

Compostela, 28 de abril de 2022.-

Na fotografía: Marcos Maceira (Queremos Galego), Fernando Lacaci (ANPAS Galegas), Suso Bermello (CIG), Lucía López (BNG), Xerardo Roca (AS-PG), Daniel Asorei (AELG), Andrés Bellas (APRADOGA), Iria Taibo (AGPTI), Uxía Caride e Xosé Lois Ledo (AGAPI), Xosé Barato e Toni Salgado (AAAG), Dores Vidal, Sara Seco e Leo Rei (MNL).

AUTOBUSES 2022


A plataforma Queremos Galego! está a organizar a saída de varios autobuses das principais cidades para facilitar a participación na manifestación a prol galego «Por un novo futuro para a lingua» que terá lugar o 17 de maio ás 12h en Compostela.

*O custe será de 5€ por persoa.

TELÉFONOS DE CONTACTO PARA ANOTARSE NOS AUTOBUSES PARA ASISTIR Á MANIFESTACIÓN:

✅ A Coruña: 981 169 810
Ferrol: 630 219 861 / 981358750
✅ Lugo: 982 225 812/ 982 280 410 (Saída ás 10:00h de Ronda da Muralla, 58)
✅ Vigo: 986 827 900
✅ Pontevedra: 986 866 205
✅ Ourense: 988 233 134
A Mariña: 982 581 861 / 982 140 654 ou 605 377 317

https://www.queremosgalego.gal/
_______

mércores, outubro 06, 2021

Ser galegofalante na Galiza, ... Por André Abeledo Fernández


Por André Abeledo Fernández [*]
06.10.2021


Sei que non son o único traballador cara o público, que nalgún momento da súa vida tense sentido agredido por usar o seu idioma, o galego, na súa propia terra.

No meu caso son xa 25 anos traballando cara o público en distintas empresas, e teño tido que soportar este tipo de actitudes, irrespectuosas, e intentos de humillación en demasiadas ocasións, sempre son demasiadas porque non debería suceder nunca.

Cando un cliente me recrimina por falar en galego na Galiza existe claramente un problema, cando alguén se atreve a dicir que non te dirixas a el nese dialecto e o fagas en español, esta tentando denigrar o noso idioma  e está a agredir aos galegofalantes na súa propia terra, o fan aproveitando ademais a situación de vantaxe e superioridade ao agredir a unha persoa que esta traballando e non pode responder como é debido.

Neste caso ademais os galegofalantes nos atopamos cunha gran indefensión, cando se vulnera o dereito fundamental de poder utilizar o galego na Galiza non temos ferramentas legais para defendernos.

A verdade que cando tentar humillar o teu idioma é difícil manter a compostura. Persoalmente cando vexo que é xente de fóra sempre cambio ao castelán, non teño problema, pero normalmente os estranxeiros son os máis educados, e ata lles gusta escoitar a nosa fala. O problema ven cando dás con algún Talibán nacionalista español.

Namentres existan este tipo de actitudes que tentan humillar o meu idioma e menosprezar a miña nación dificilmente poderá haber convivencia.

Namentres se vulneren impunemente os meus  dereitos fundamentais como galego, se menosprece o meu idioma, o meu acento e a miña cultura será imposible que me sinta parte do Estado español.

Namentres teñamos un goberno da Xunta de Galicia que traballa para facer do noso idioma algo residual, e un españolismo que nos ve e nos trata como inferiores, a nosa mellor arma e falar galego para seguir sendo galegos.

[*] André Abeledo Fernández, nado en Neda o 14 de Xullo de 1974, militante comunista e sindicalista. Delegado de persoal da CIG no comité de empresa de Mercadona na Provincia d'A Coruña. | Facebook e Twitter.

Enviado por:
André Abeledo Fernández
-andre1474@gmail.com-
5 de outubro de 2021 14:3
3

_______

martes, xuño 29, 2021

Co galego falamos de todo! As revistas en papel - Vídeo - As revistas levan ducias e ducias de anos contando a nosa historia


As revistas levan ducias e ducias de anos contando a nosa historia. Atopabamos artigos en galego en 'Vida Gallega', unha revista que viu saír o seu primeiro número en xaneiro de 1909 cunha portada deseñada por Alfonso Daniel Rodríguez Castelao. El mesmo tamén formou parte da revista Nós, publicada entre 1920 e 1936. Esta marcaría toda unha xeración da historia do noso.

Trala morte do ditador Franco, volven aparecer novas revistas en galego, moitas delas especializadas. Por exemplo, Braña a revista científica da Sociedade Galega de Historia Natural. Ou mesmo Andaina, a revista galega feminista que botou a andar en 1983.

E hoxe, nacen novas revistas en galego? Como afrontan os desafíos co dixital? Percorremos as librarías, as redaccións e mesmo as facultades... para descubrilo!


Fonte: Nós Televisión. | 26 de xuño de 2021.

Nós Televisión somos unha televisión galega, en galego e centrada no país. Atópanos no dial 119 de R, nas redes sociais en nostelevision.gal.
_______

luns, xuño 07, 2021

Paradoxos, ... Por Xosé María Dobarro


Por Xosé María Dobarro [*]
07.06.2021


Con frecuencia escoitamos falar das bondades da UE e moi raras veces das maldades, que é evidente que as hai, e máis das que puidese parecer. Desde logo, eu nunca mostrei moitas simpatías por esta Europa, fundamentalmente, de mercaderes. Non debemos perder de vista que, antes que UE, se denominou Mercado Común Europeo e Comunidade Económica Europea, nomes que, sen dúbida, explican mellor de que vai a cousa que o enganoso Unión. Mais non é disto do que quero falarlles hoxe.

Penso que entre as cousas positivas, esas que non teñen que ver cos mercadeos está a Carta Europea das Linguas Minoritarias ou Regionaiseses idiomas minorizados que utilizan regularmente por volta de 40 millóns de cidadáns da Unión, entre eles nós– e a Carta dos Dereitos Fundamentais da Unión Europea, no que se refere á prohibición da discriminación por razón de lingua e asegurando o respecto á diversidade lingüística. A Comisión Europea impulsa a diversidade lingüística e fai o posible por preservala, sen se meter, iso si, no réxime xurídico e no apoio que reciban eses idiomas, que corresponde aos gobernos dos estados.

Pensei nisto despois de ter noticia da situación idiomática que, se non hai quen o remedie, imos atopar nos nosos documentos de identidade cando nos toque renovalos. Non sei se vostedes saben con precisión cal é a fasquía que presentan os seus, os que adoitan portar nas súas carteiras. Abofé que eu non tiña moita idea de como está o meu -renovado hai un par de anos- porque nunca o miro. Fíxeno agora para confrontar co que se nos aveciña. Actualmente atopamos en bilingüe os epígrafes apellidos / apelidos, nombre / nome, nacionalidad / nacionalidade, fecha de nacimiento / data de nacemento, domicilio / domicilio, lugar de nacimiento / lugar de nacemento, hijo/a de / fillo/a de, Só aparecen exclusivamente en español: España e Documento Nacional de Identidad. O de España, que en galego é igual, vén a conto porque tamén aparece así, só, nos documentos cataláns.

Trátase como se ve de pequenos detalles -case poderiamos cualificalos de nimiedades- mais que se van perder nos novos documentos identificativos, que nos queren vender como se fosen a panacea universal. Só lles vai faltar arrouparnos polas noites.

Dise que se cambia para cumprir co regulamento da UE que estableceu as características que deben ter os documentos de identidade dos Estados que a conforman. Unha destas é a de ser bilingüe, por ter que usar o oficial de cada Estado e outro dos oficiais da Unión. Podería acontecer que Letonia escollese o estonio para acompañar o letón. España non o escolleu, foi, faltaría máis, ao inglés, que a día de hoxe só é cooficial en Malta e Irlanda. Curioso, non? O que me pregunto é se esa Unión que, como vimos, di protexer e non discriminar idiomaticamente foi quen decidiu eliminar a presenza do galego, do euskera ou do catalán presentes nos actuais documentos. Ou sería o propio goberno? Porque todo este proceso se levou caladiñamente. ¿Cómo es el nuevo DNI 4.0 que prepara el Gobierno? Lembro ter lido ou escoitado algo sobre un DNI 4.0 ou algo así contra o final do ano pasado, mais non recordo ter sabido máis ata o de agora.

[*] Xosé María Dobarro Paz (Ferrol, 1950), escritor, articulista, profesor, activista cultural e político. Catedrático xubilado de Lingua e Literatura Galega na Universidade da Coruña. |  Diario de Ferrol. | Publicado no D.F. o domingo, 6 de xuño de 2021, 00:24 |

_______

mércores, febreiro 10, 2021

O conservatorio Xan Viaño de Ferrol é un dos gañadores do concurso de curtas 'Senda dos Faros', cun proxecto denominado 'A melodía do faro', a historia dun fareiro de Cabo Prior namorado da música, con interpretación do propio alumnado do centro - Vídeo


O certame escolar, promovido pola Xunta, o Festival de Cans e EDPR, pon en valor a lingua, o patrimonio e a paisaxe da costa galega a través do audiovisual, este ano foron gañadores o IES A Cachada (Boiro), o IES Monte Neme (Carballo) e o conservatorio Xan Viaño de Ferrol.

O certame escolar naceu co obxectivo de poñer en valor a lingua, o patrimonio e a paisaxe da costa galega a través do audiovisual.

O Terceiro Premio foi para o centro de Ferrol  "CMUS Xan Viaño", cun proxecto denominado "A melodía do faro", a historia dun fareiro de Cabo Prior namorado da música, con interpretación do propio alumnado do centro. Este premio esta dotado cun cheque-regalo de 400 € para material audiovisual ou literario en lingua galega, figura e diploma acreditativo.


https://youtu.be/abMGVczDeaI

A Consellería de Cultura, Educación e Universidade impulsou a iniciativa escolar Senda dos Faros no curso 2019-2020 cos obxectivos de promover o valor lingüístico, patrimonial e paisaxístico da costa galega ao longo do máis de medio cento de etapas que configuran o itinerario turístico, desde Tapia de Casariego (Asturias) ata Vila Nova de Cerveira (Portugal), para alén das etapas insulares de Ons, Cíes e Sálvora.

Nel contou coa colaboración da Axencia de Turismo de Galicia, da Axencia Galega de Desenvolvemento Rural-Agader, do Instituto de Estudos do Territorio (IET) e do Festival de Cans, co patrocinio da portuguesa Fundación Enerxías de Portugal Renovables (EDPR).

Destinado ao alumnado dos centros docentes da Consellería de Cultura, Educación e Universidade que imparten ensinanzas de educación secundaria (ESO, bacharelato, formación profesional básica, ciclos formativos de grao medio) e ensinanzas especiais de grao medio, contou coa colaboración de 18 centros educativos que presentaron 24 curtas dun máximo de cinco minutos de duración, segundo o establecido nas bases da convocatoria.

O concurso ten como obxectivos:
  • dinamizar o uso da lingua galega entre o alumnado e entre a comunidade educativa
  • promover unha imaxe positiva e actual do galego por medio da vinculación coas tecnoloxías da información e da comunicación
  • favorecer a presenza e o uso do galego en novos espazos e soportes
  • fomentar o galego oral, coa creación de novos ámbitos de uso frecuente que favorezan a utilización da lingua dentro e fóra das aulas
  • pór valor, promover e fomentar o coñecemento do patrimonio, a paisaxe, a natureza, as lendas, a gastronomía, ou calquera outro activo do territorio polo que atravesa a Senda

O Segundo Premio foi para o IES Monte Neme de Carballo, con "De naufraxios, faros e lendas: do Cemiterio dos ingleses a Camariñas", un proxecto centrado nos mitos e lendas arredor da Costa da Morte, alimentados polos numerosos naufraxios sucedidos nas súas augas. O afundimento do buque escola inglés Serpent, cuxos 175 tripulantes falecidos descansan e dan nome ao Cemiterio dos Ingleses, é un dos feitos narrados. E o Primeiro Premio foi para o IES Plurilingüe A Cachada (Boiro) co proxecto "Sálvora". Este proxecto é unha reflexión dunha rapaza sobre o cambio climático, a relación entre a pandemia e o descoido da natureza por parte da humanidade e a despreocupación que sinte da sociedade cara estes feitos. A protagonista lanza unha mensaxe de esperanza nunha botella desde a costa da illa para atopar persoas que, emulando ás Heroínas de Sálvora, se decidan a dar un paso adiante para a salvación do planeta, considerando que aínda non é tarde para actuar.

Resolución publicada o pasado 28 de xaneiro de 2021, pola que se conceden os premios do Concurso de Curtas Senda dos Faros.

Fonte: https://www.lingua.gal/. | 5 de Febreiro de 2021.
_______

venres, xaneiro 08, 2021

Aos meus amigos e amantes da cultura - Defendamos um interessante site de consulta cultural - De Brasil para o mundo: Uma bela biblioteca digital, desenvolvida em software livre


Aos meus amigos e amantes da cultura

Com um grande abraço e o pedido no sentido de encaminharem para um significativo número de amigos e amigas, sob pena de, por inércia, se perder um interessante site de consulta cultural.

Andem lá. Cada um encaminha para 20 a 25 destinatários e em breve contribuiremos para o reforço da existência do site.

Já que o ensino se está a tornar pago, aproveitemos o que ainda é gratuito!

Uma bela biblioteca digital, desenvolvida em software livre, mas que está prestes a ser desactivada por falta de acessos. Imaginem um lugar onde você pode gratuitamente:

  • Ver as grandes pinturas de Leonardo Da Vinci;
  • Escutar músicas em MP3 de alta qualidade;
  • Ler poesia de Fernando Pessoa
  • Ler obras de Machado de Assis ou a Divina Comédia;
  • Ter acesso às melhores histórias infantis e vídeos da TV ESCOLA
  • E muito mais...

Esse lugar existe!

O Ministério da Educação disponibiliza tudo isso, bastando acessar o site:

www.dominiopublico.gov.br

Só de literatura portuguesa são 732 obras!

Estamos em vias de perder tudo isso, pois vão desactivar o projecto por desuso, já que o número de acesso é muito pequeno. Vamos tentar reverter esta situação, divulgando e incentivando amigos, parentes e conhecidos, a utilizarem essa fantástica ferramenta de disseminação da cultura e do gosto pela leitura.

Divulgue para o máximo de pessoas!

_______