domingo, xuño 04, 2023

Concentración en Ferrol e n'As Pontes, como en moitas cidades e vilas da Galiza, en repulsa polo asasinato machista de Vanesa en Mougás, Oia - Mobilizacións contra o feminicidio, este luns 5 de xuño, ás 8 da tarde na Praza de Armas e ás 8 e 1/2 na Praza do Hospital


Desde o feminismo galego chamamos a mobilizarnos masivamente para dar resposta ao feminicidio deste sábado 5 de xuño en Mougás, concello de Oia.

Concentración asasinato machista

A Marcha Mundial das Mulleres de Ferrolterra, ante o asasinato, o pasado domingo en Oia, de Ana Vanesa, chamamos a mobilización para dar resposta a esta nova agresión criminal e machista contra as mulleres.

Día: Luns 5 de xuño
Hora: ás 8 da tarde.
Lugar en Ferrol: Praza de Armas.
Hora: ás 8 e 1/2 da tarde.
Lugar n'As Pontes: Praza do Hospital.

Nin un paso atrás contra a violencia machista!

#MachismoMata #BastaDeViolencia #Feminicidio #NenUnhaMáis #NenUnhaMenos #FeminismoParaResistir #FeminismoParaVivir #QuerémonosVivas
"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
https://www.facebook.com/marchamundialmulleres.galiza
twitter.com/MMMGaliza

Enviado por:
Marcha Mundial Ferrolterra
-mmmferrolterra@gmail.com-
4 de junho de 2023 às 21:27

_______

Novo asasinato machista na Galiza - A muller asasinada, recibiu varios disparos cando saía de traballar tras finalizar a súa xornada laboral


Novo asasinato machista na Galiza

UNHA MULLER ASASINADA EN OIA NA TARDE DESTE SÁBADO, POLA SÚA EXPARELLA, QUE TIÑA UNHA ORDE DE AFASTAMENTO

A muller asasinada, traballadora da limpeza do cámping, recibiu varios disparos cando saía de traballar tras finalizar a súa xornada laboral.

Os feitos producíronse á primeira hora da tarde do sábado nas inmediacións do cámping O Muíño, situado na parroquia de Mougás, ao pé da estrada que une Baiona e A Guarda.

O asasino escapou, foi encontrado escondido no monte, mais non se entregou e pasadas as 10 da noite pegouse un tiro.

O asasino era guardia civil, ao que se lle retirara a arma regulamentaria, e só facía funcións administrativas.

 Este maltratador e asasino tiña unha orde de afastamento de 300 metros da vítima e a prohibición de comunicarse con ela.

A vítima era natural de Lugo e vivía no municipio desde facía pouco tempo "acollida" por unha veciña.

Este sería o segundo crime machista ocorrido na Galiza este 2023 tras o asasinato dunha muller en Baiona o pasado mes de febreiro polo que foi detida a súa ex parella.

Galiza ten activos máis de 4.000 casos de vítimas de violencia machista
A Delegación do Goberno español informou que hai 688 as mulleres vítimas de malos tratos na Galiza usuarias do servizo de atención telefónica 24 h 'Atenpro' e 113 maltratadores condenados están vixiados permanentemente con dispositivos de control telemático.

Fonte: Nós Diario
https://www.nosdiario.gal/
_______

mércores, abril 26, 2023

Este mércores 26 de abril, en Ferrolterra como noutras comarcas da Galiza, está convocada unha mobilización na defensa da sanidade pública - Manifestación ás 8 da tarde, desde diante do Centro de Saúde Fontenla Maristany - Pola defensa e o fortalecemento da Atención Primaria apoiemos a ILP - Texto da ILP presentada


En Ferrolterra sumamo-nos este mércores día 26 de abril ás manifestacións e concentracións convocadas por SOS Sanidade Pública en diferentes cidades e vilas da Galiza, para reclamar medidas para o fortalecemento e defensa da Atención Primaria

Todo o noso apoio á Iniciativa Lexislativa Popular proposta e promovida pola Plataforma SOS Sanidade Pública para salvar e reforzar a Atención Primaria de Galicia, a cal está en deterioro constante pola mala xestión do goberno da Xunta.

A ILP quere chamar a atención e poñer en marcha unha serie de medidas para revitalizar e fortalecer a atención primaria.

Un resumo esquemático das medidas propostas é o seguinte:

🚩 Atención presencial ou telemática decidido polo paciente.

🚩 Resposta telefónica por unha persoa, non dun robot, non de máquinas.

🚩 Adecuar os cadros de persoal ás necesidades da poboación para garantir unha atención de calidade.

🚩 Limitar o número de consultas diarias para permitir un tempo de atención axeitado ás necesidades dos pacientes.

🚩 Garantir estabilidade laboral e condicións laborais adecuadas e atractivas, para fidelizar aos profesionais.

🚩 Garantir a participación cidadá.

🚩 Reducir as listas de espera para probas diagnósticas e para consultas hospitalarias.

🚩 As persoas que non desexen ser atendidos en centros privados non perderán o seu posto no rexistro na lista de espera.

🚩 Autonomía de xestión na atención primaria, sen dependencia do hospital.

🚩 Garantir a accesibilidade sanitaria en condicións de equidade, independientemente do lugar onde se viva, xa que no medio rural hai zonas con moitas máis dificultades de acceso que o resto.

Chamamos á participación da veciñanza das comarcas nesta Manifestación que convocamos para este mércores día 26 de abril, ás 8 da tarde que partirá das inmediacións do Centro de Saúde Fontenla Maristany (Praza de España) até a Praza de Armas.

Os dereitos que non se defenden, pérdense !!
Participa !


✅ TEXTO DA PROPOSICIÓN DE LEI, POR INICIATIVA LEXISLATIVA POPULAR, SOBRE MEDIDAS URXENTES PARA RECUPERAR E FORTALECER A ATENCIÓN PRIMARIA. | Acceder/Baixar.
_______

venres, marzo 03, 2023

A Marcha Mundial das Mulleres: este 8 de Marzo de 2023, por uns servizos públicos para mellorar a vida das mulleres - A manifestación de Ferrol sairá, o mesmo mércores 8 de marzo, ás 8 da tarde, desde a Praza Amada Garcia, diante do Edificio da Xunta



En Ferrol como nas outras cidades da Galiza, terá lugar unha manifestación que partirá, o mesmo mércores 8 de marzo, ás 8 da tarde, desde a praza Amada Garcia (diante do Edificio Administrativo da Xunta de Galicia).

O 2023 non é un ano calquera. Enfrontamos, a diario, ataques e agresións a un estado de benestar que se derruba por momentos.

Enfrentamos tamén unha economía galega ao servizo de intereses alleos a Galiza. Como resultado das últimas crises fica desaparecido o suposto papel protector do sistema público de servizos sociais e a importancia dos servizos públicos no sistema capitalista vese relegada a un segundo, terceiro ou cuarto lugar.

Levamos moitos anos denunciando o desmantelamento dos servizos públicos fronte ao lucro do grande capital, alertamos das reformas, da queda do público fronte o privado. A resistencia feminista continua alerta na Galiza. Por iso nós, da Marcha Mundial das Mulleres, dicimos: Servizos públicos para mellorar a vida das mulleres!

Estas son as nosas exixencias inmediatas!

"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
https://www.facebook.com/marchamundialmulleres.galiza
twitter.com/MMMGaliza

Enviado por:
inacioGZ
-inaciogz@gmail.com-
2 de março de 2023 às 22:31
Marcha Mundial Ferrolterra
-mmmferrolterra@gmail.com-
3 de março de 2023 às 11:56

mércores, marzo 01, 2023

Emotiva homenaxe a Rafael Pillado Lista, no lugar de San Felipe, Brión, Ferrol - Vídeo do acto


O sábado 25 de febreiro de 2023, tivo lugar un Acto Cívico dedicado a Rafael Pillado Lista, en San Felipe, parroquia de Brión, concello de Ferrol. O acto foi organizado pola asociación cultural Fuco Buxán, a asociación de vítimas do amianto AGAVIDA, o Comité Cidadán de Emerxencia para a Ría de Ferrol, a asociación Memoria Histórica Democrática, e familiares e amigos. Unha emotiva homenaxe pública coa participación de numerosas persoas, familiares, compañeiras e amigas. E coa intervención de representantes das organizacións convocadoras, familiares, música, poesía, e palabras de recoñecemento e amizade.

Este lugar de celebración, onde se depositaron parte das cinzas dos seus restos foi elixido polo propio Rafael, el deixou a súa vontade de que unha parte se depositaran en Ferrol no nicho familiar, outra parte en San Felipe onde pasou a maior parte da súa infancia e mocidade e outra en San Cibrao, concello de Cervo, onde naceu e pasou unha parte da súa infancia.



#RafaelPilladoLista

Rafael Pillado Lista, San Cibrao (Cervo), 12 de xuño, de 1942 - Ferrol, 20 de febreiro, de 2023.

✅ Foto de María Teresa Martínez Vilariño. | Ir ao Álbum.

Editado por Ártabra 21
artabra21@gmail.com
https://artabra21.blogspot.com/
_______

martes, febreiro 28, 2023

O colectivo 'Opai Teatro', ao piques de cumprirse o remate dos actos do 50 aniversario dos históricos sucesos de Marzo do 72, presenta a obra 'De Marzo a Marzo', o vindeiro venres 3 de marzo


O colectivo "Opai Teatro" de Canido, ao piques de cumprirse o remate dos actos do 50 aniversario dos históricos sucesos do 10 de Marzo de 1972, presenta a obra de teatro "De Marzo a Marzo", o vindeiro venres 3 de marzo, ás 20:30hs, no Teatro Jofre. Entrada libre con invitación ate completar aforo, retirada de entradas en taquilla.

Escrita por Cristina Mariño e Carlos Castrillón, baixo a dirección de Cristina Mariño.

Reparto: Juani Hernández, José Piñeiro, Daniel Solloso, Franki Muiño, Marga G. Pita, Carmen Caeiro, Miguel Curveira, Alexis Sequeiro, Alba Santalla e Luis Pillado.

A obra situase 50 anos despois dos sucesos do 10 de marzo de 1972 en Ferrol e confronta aqueles momentos cos desafíos da realidade actual, a través dos seus personaxes representados por un elenco de dez actores e actrices. O texto, comprometido e testemuñal, mestura a visión tráxica con doses de comedia nun intenso exercicio de memoria colectiva.

" ... A representación fai un percorrido por unha historia que case se esquece, porque hai unha xeración que a descoñece, xente de menos de 50 anos que non sabe que algo así marcou a historia desta cidade e probablemente teñan preto a xente que o viviu, que saíu á rúa, pero que cala. A obra con toque de humor fainos ver a esa xente e lembrar que hai 50 anos que se produciron as mortes de Daniel e Amador. Todo a través da historia dun adolescente que chega a casa e pide ao seu pai que lle axude cun traballo sobre esa historia. De marzo a marzo naceu dunha petición dun dos actores, Luis Pillado (irmán de Rafael Pillado) e a implicación dos autores..." [Isidoro Valerio]

De marzo a marzo é un diálogo constante entre o presente e o pasado, entre a comedia e o drama, entre a tenrura e a raiba. Un retrato actual das cousas que cambian co paso da historia e daquelas que parecen non mudar. Unha peza conmovedora que non nos deixará indiferentes.



O vídeo corresponde á estrea celebrada no teatro-capela do Centro Cultural Torrente Ballester de Ferrol, interpretada o 17 de xuño, de 2022. Logo foi representada en Mugardos, Ribadeo e Caranza con moito suceso.

✅ Opai Teatro en Facebook.

E-mail:

10m72.50aniversario@gmail.com

Podes seguirnos na nosa páxina de Facebook: Dez De Marzo Cincuenta Aniversario,.
_______

Presentación do libro: 'Manuel López Pinal: Crónica dun radiotelegrafista da Flota republicana' - Mércores día 1 de marzo ás 19,30 hs, no Ateneo Ferrolán



Presentación do libro:

"Manuel López Pinal: Crónica dun radiotelegrafista da Flota republicana"

Día: mércores 1 de Marzo.
Hora: ás 19:30 hs.
Lugar: Ateneo Ferrolán, na rúa Madalena, 202-204
Participan: Xosé Manuel López Franco, Juan Galán e Antón Mascato.

--
Cristina Meizoso
Secretaría
Ateneo Ferrolán, fundado en 1879.
Un lugar de encontro para a cultura
.

e-mail: secretaria@ateneoferrolan.org | Telf.: +34 981 357 970 | 644720055 | Dirección Postal: Rúa Magdalena 202-204. CP.15402 | FERROL (A Coruña) Síguenos:
TWITTER: @ateneoferrolan
BLOG: http://ateneo-ferrolan.blogspot.com/
FACEBOOK: @AteneoFerrolan


Enviado por:
Ateneo Ferrolán Fundado en 1879
-secretaria@ateneoferrolan.org-
28 de fevereiro de 2023 às 13:20

_______

venres, febreiro 24, 2023

Acto Cívico dedicado a Rafael Pillado, este sábado 25 de febreiro, ás 11 da mañá, en San Felipe


Este sábado 25 de febreiro, ás 11 da mañá, na rampla do Castelo de San Felipe, a asociación Fuco Buxán, organiza un Acto Cívico dedicado a Rafael Pillado Lista [*].

Sempre na nosa memoria.

#RafaelPilladoLista

[*] Rafael Pillado Lista, San Cibrao (Cervo), 12 de xuño, de 1942 - Ferrol, 20 de febreiro, de 2023.
_______

mércores, febreiro 22, 2023

Deixou-nos Rafael Pillado, compañeiro e amigo, mais a súa luz sempre brillará para nós



Deixou-nos Rafael Pillado, compañeiro e amigo

Desde o Colectivo Ártabra 21, pensamos que podemos falar por todos os seus membros, sentimos con dor o seu pasamento. Para nós Rafael [*] sempre foi unha referencia, pola súa forza, ánimo e compromiso con todas as causas xustas, non só pola súa pegada na Historia deste pobo, en particular no mundo obreiro, senón pola súa actitude de dignidade, loita e solidariedade. Admirabamos e respectabamos a Rafael, porque del emanaban valores para facer o ben e evitar o mal. Era unha persoa que practicaba a ética na acción e non nos deixaba indiferentes. Construtor de pontes, creador de iniciativas, solidario, sempre no camiño de facer o ben común e compartir a felicidade coas persoas. Deixounos Rafael, mais a súa luz sempre brillará para nós. Unha forte aperta, compañeiro e amigo.

Todos os dias te penso. Todos os dias te aprendo. Cada palavra na que coincidimos, cada ato no que atuamos, cada ideia na que divergemos, cada alento que temos respirado juntos na luita.

Ouh capitam, meu capitam!

Armas de guindastre, chifres de liberdade, barcos e gente na dura luita.

Rafael Pillado digo, e ti dirás um de tantos, um de tantas.

Mestre sem escola, camarada sem partido, sindicalista sem mesa, congressista sem ordenado.

Ouh capitam, meu capitam!

Perseguidor de enfermedades que te atrapam sem remédio, mas sem medo.

Coletivista que até à morte sabes dar pulo de açom reivindicativa.

Aqui um soldado, meu capitam!

Um soldado que nom dou para sargento. Mas que te ama e respeita, mesmo na discussom sinceira.

Aqui na factoria da vida e na batalha pola história que nos alimenta.

Ferrol, a 7 de outubro, de 2022

Xam Tabia

Rafael Pillado en Ártabra 21.

#RafaelPilladoLista

[*] Rafael Pillado Lista, San Cibrao (Cervo), 12 de xuño, de 1942 - Ferrol, 20 de febreiro, de 2023.

_______

luns, febreiro 20, 2023

No pasamento de Rafael Pillado


No pasamento de Rafael Pillado


No pasamento, vítima do amianto, do noso querido compañeiro RAFAEL PILLADO LISTA, este Comité Cidadán de Emerxencia para a Ría de Ferrol, do que el era cofundador, quere agradecer profundamente a súa entrega, durante estes 20 anos de loita, na defensa da legalidade, da ría e da vida fronte a ameaza permanente da Planta de Gas.

Sempre na nosa lembranza, enviamos a nosa máis fonda solidariedade a súa familia, amizades, compañeiras e compañeiros.


Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc


#RafaelPilladoLista

Enviado por:
Comite Cidadan de Emerxencia
-comitecidadan@gmail.com-
20 de fevereiro de 2023 às 20:21

_______

mércores, febreiro 08, 2023

Concentración en Ferrolterra, como en moitas vilas e cidades da Galiza, en repulsa polo asasinato machista de Beatriz Lijó en Baiona - Mobilizacións contra o feminicidio, este mércores 8 de febreiro, ás 8 da tarde


Desde o feminismo galego chamamos a mobilizarnos masivamente para dar resposta ao feminicidio deste domingo 5 de febreiro en Baiona

Concentración asasinato machista

A Marcha Mundial das Mulleres de Ferrolterra, ante o asasinato, o pasado domingo en Baiona, de Beatriz Lijó, chamamos a mobilización para dar resposta a esta nova agresión criminal e machista contra as mulleres.

Día: Mércores, 8 de Febreiro
Hora: ás 8 da tarde.
Lugar: Praza de Amada García (Diante do Edificio da Xunta de Ferrol).

Nin un paso atrás contra a violencia machista!

#MachismoMata #BastaDeViolencia #Feminicidio #NenUnhaMáis #NenUnhaMenos #FeminismoParaResistir #FeminismoParaVivir #QuerémonosVivas
"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
https://www.facebook.com/marchamundialmulleres.galiza
twitter.com/MMMGaliza

Enviado por:
Marcha Mundial Ferrolterra
-mmmferrolterra@gmail.com-
7 de fevereiro de 2023 às 17:37

_______

domingo, febreiro 05, 2023

Tiveron lugar en Pontevedra as Xornadas Temos Alternativas: Eólica Así Non ! - Tecer un modelo enerxético alternativo fronte ao espolio da especulación das macro-eléctricas


Xornadas Temos Alternativas

Esta fin de semana tiveron lugar no Pazo da Cultura de Pontevedra as Xornadas Temos Alternativas organizadas pola Coordinadora Eólica Así Non á que pertence Ortegal di Non.

As xornadas xurdiron para poder reforzar o tecido creado polas plataformas que se están levantando ao longo do territorio galego, como ferramenta e intercambio de coñecementos onde profesionais de distintos ámbitos intentaron dar luz sobre este cambio de modelo enerxético e onde se deron alternativas ao mesmo.

Os 28 poñentes que colaboraron trataron a situación actual enerxética, a eólica mariña e hidroeléctricas, o contexto xurídico-legal, o autoconsumo e comunidades enerxéticas e ata as alternativas enerxéticas no mundo entre outros temas.

O conxunto dos máis de 200 asistentes considera que estas xornadas foron un éxito rotundo e felicitan á organización por un evento tan necesario dado o panorama actual onde as plataformas e asociacións sentimos que a administración favorece os lobis das enerxéticas e o sentimento de indefensión e cada vez máis latente na cidadanía.

Programa das Xornadas | Baixar/Acceder.




Luka, Ortegal di Non

Enviado por:
Ortegal Di Non
-ortegaldinon@gmail.com-
5 de fevereiro de 2023 às 20:52

_______

Lembrando a Carmelo Teixeiro, quen fora o primeiro Coordinador do Comité Cidadán de Emerxencia para a Ría de Ferrol e de todas as compañeiras e compañeiros que nos acompañaron nestes 22 anos de actividade en defensa da nosa Ría, contra o despropósito gasista de Reganosa


Ofrendas florais en Parque Carmelo Teixeiro

O 15º aniversario do pasamento de Carmelo Teixeiro, Coordinador deste Comité Cidadán de Emerxencia.

O Concello de Ferrol lembrou o 15º aniversario do falecemento de Carmelo Teixeiro, cunha ofrenda floral, no parque de Caranza que leva o seu nome.

PARQUE CARMELO TEIXEIRO MENÉNDEZ (Mugardos 1937 – Ferrol 2008). O Excmo. Concello de Ferrol en sesión plenaria do 26.02.2009, acordóu nomear este espazo público na memoria deste activista social, sindical e político, que foi Coordinador do Comité Cidadán de Emerxencia para a Ría de Ferrol, polo seu labor na transición, a súa implicación sindical, a defensa das liberdades e da nosa ría e a súa coherencia na loita polos principios democráticos. 8 de xuño de 2018. Memoria de Ferrol”.

O Comité Cidadán de Emerxencia para a Ría de Ferrol, depositou hoxe unha ofrenda floral no Parque Carmelo Teixeiro de Caranza, en memoria de quen fora o primeiro Coordinador deste Comité e de todas as compañeiras e compañeiros que nos acompañaron nestes 22 anos de actividade en defensa da nosa Ría, da legalidade e da vida das persoas que habitan na súa contorna, sempre coa ameaza presente dunha Planta de Gas no centro dela, que, a pesar dos permisos que unhas administracións cómplices lle conceden, segue incumprindo todas as normas de seguridade segundo demostraron as cinco sentenzas xudiciais en contra dela.

Hoxe cúmprense 15 anos do pasamento de Carmelo pero lembramos tamén a:

José Gabeiras - presidente de honra do Comité Cidadán in aeternum (Xaneiro de 2005), Xaime Quessada autor do mural contra a imposición de Reganosa, mural que agora se expón no Auditorio Municipal de Ferrol (Decembro de 2007), Santiago Torrente 'Tito' (Marzo de 2009), Tino Deibe autor do logotipo do Comité (Maio de 2010), José Luís Estévez Barros 'Seli' (Decembro de 2011), Regino Varela (Xullo de 2014), Victoria Fernández Paredes, (compañeira de Carmelo, falecida o 8 de novembro de 2014), Ramón Capotillo (Febreiro de 2015), Luís Matalobos (Outubro de 2015), Julio Videira (Xuño de 2016), Joaquín Cupeiro (Decembro de 2016), Julio Pico (Xuño de 2017), Bernardo Bastida, (Xaneiro de 2018), Emilio Romero "Milín" (Marzo- 2018), Mel Sanxoán (Abril de 2018), José Luis Rodríguez Pardo (Xuño de 2018), Helena Sánchez (Novembro de 2018), Pepe Leira (Outubro de 2019), Ricardo González Costas "Cardín" (Xaneiro de 2020), Víctor Agulló López (11 de Xullo de 2021),  Eugenio Pereiro Couce (4 de novembro de 2021), Marichy Cuadrado Caruncho (14 de xaneiro de 2022) e Antonio Dopico Carro (23 de xaneiro de 2022).

Todas e todos sempre na nosa memoria!

Enviado por:
Comité Cidadan de Emerxencia
-comitecidadan@gmail.com-
5 de fevereiro de 2023 às 17:1

_______

Nova plantación de Betula, a asociación para a custodia do bosque atlántico das comarcas, desta vez en Montefaro, sobre unha parcela en custodia que foi deseucaliptizada


O vindeiro o sábado 11 de febreiro en Montefaro, Betula, a asociación para a custodia do bosque atlántico, realizará unha primeira fase de plantación de 50 arbores, principalmente carballos. Trátase dunha finca en custodia que foi deseucaliptizada o ano pasado e van comezar a plantar especies autóctonas.

O terreo e chan e non ten ningunha dificultade para acceder a él polo que é apto para tódalas idades e condicións físicas.

Lembramos a importancia do VOLUNTARIADO para a transformación destas zonas degradadas; os traballos de limpeza, deseucaliptización, plantación de autóctonas… requiren de man de obra de xente extraordinaria. ANÍMATE!!

Non dubidedes en formar parte desta loita, agora máis que nunca FAITE SOCIO E COLABORA!!

Para mais información e para confirmar asistencia, CONFIRMADE POR CORREO:

custodia.betula@gmail.com

Na actualidade custodian-se 142.712 m² en propiedade e 2.725.586 m² en convenio: Visor.

O ano 2022 rematou coa adquisición dun total de 13.983 m2 repartidos en diferentes localizacións principalmente nos concellos de Ares e Monfero.

Mais a cousa non remata aquí xa que neste 2023 xa contamos con 1.703 m2 de novo terreo en propiedade na zona de Montefaro en Ares.

Todas as parcelas cumpren cos requisitos de seren zonas degradadas cun alto valor medioambiental, cultural e paisaxístico.

As terras de Ares localízanse principalmente na zona de A Bailadora e do Mosteiro de Santa Catalina de Montefaro, situado na parroquia de Cervás.

O BOSQUE SOMOS NOS

http://www.betula-atlantico.eu

Info baseada na enviada por:
Asociación Custodia Bosque Atlántico BETULA
-custodia.betula@gmail.com-
4 de fevereiro de 2023 às 22:50

_______

sábado, febreiro 04, 2023

Este domingo 5 de febreiro lembramos ás compañeiras e compañeiros que finaron no transcurso da loita contra a Planta de Gas de Mugardos - Cumpre-se o quince cabodano da morte de Carmelo Teixeiro


Este domingo 5 de febreiro lembramos ás compañeiras e compañeiros que finaron no transcurso da loita contra a Planta de Gas de Mugardos.

Cumpre-se o quince cabodano da morte de Carmelo Teixeiro. Ao redor desta data é cando lembramos a todas as persoas que, como Carmelo, participaron na loita contra o despropósito gasista de Reganosa, na defensa da Ría, da seguridade e da vida das miles de persoas que moran na súa contorna.

Imos a depositar unha flores, este domingo ás 11:30 hs, no monumento á lembranza de Carmelo Teixeiro, no Parque de Caranza que leva o seu nome, nas inmediacións da Ermida.

Cada vez que arriba un buque LNG, normalmente son buques de grande porte próximos aos 290 metros de eslora, para descargar as decenas de miles de toneladas de gas natural licuado na regasificadora de Mugardos, perante 24 horas, aumenta de xeito exponencial, o xa de por si perigo que ten a Planta de Gas, instalada no corazón da nosa Ría. Un potencial perigo, para todas as miles de persoas que moramos na súa contorna. Unha planta de gas que Reganosa construíu na ribeira sur da nosa Ría, a poucos metros dos núcleos de poboación, empobrecendo-a aínda máis do que estaba e poñendo en perigo a seguridade e a vida das miles de persoas que moramos na súa contorna.

Para máis perigo esta planta regasificadora está á beira dun complexo industrial petroquímico que almacena centos de miles de metros cúbicos de fluídos tóxicos, propiedade dos socios promotores e maioritarios da planta de gas e que agora conforma xa un holding transnacional da enerxía (Reganosa Holdco) que xunto á transnacional nipona (Sojitz Corporation) son os propietarios da regasificadora.

Mais o aumento do potencial perigo para a poboación que mora na contorna da Ría de Ferrol non remata aí, a voraz ambición do grupo que controla Reganosa (Grupo Tojeiro) que pretende engadir (baixo a etiqueta de "verde", para facer-se con parte dos fondos europeos do NextGenerationEU), unha planta de fabricación de metanol no complexo petroquímico de Punta Promontorio.

Este 5 de Febreiro, cumpren-se 15 anos (2008) do falecemento do noso ben querido compañeiro Carmelo Teixeiro, primeiro Coordinador do Comité Cidadán de Emerxencia para a Ría de Ferrol. Como xa mencionamos, desde entón ao redor desta data, é cando lembramos a todas as persoas que como Carmelo participaban na loita contra o despropósito gasista.

Despois de que o goberno cedera ante Reganosa, concedendo os permisos de construción e funcionamento, aínda que estes chegaran despois de máis de 17 anos de ter comezado a súa construción e 13 desde a entrada en funcionamento. Todo un proceso cheo de irregularidades, onde se alegan feitos consumados, aínda que fora transgredindo toda a lexislación medioambiental en referencia a súa localización próxima a núcleos de poboación consolidados. Foron responsábeis políticos, funcionarios, tribunais, xornalistas e medios, ... os que se implicaron na fraude, para "legalizar" o despropósito gasista. Abrindo unha nova etapa na loita, despois de cinco sentenzas do Tribunal Supremo en contra da regasificadora de Mugardos.

Reganosa é unha ameaza para a vida humana e o medio ambiente e pode chegar a converterse nunha enorme traxedia, no caso dun accidente na Planta ou no gaseiro. Nesta localización, dentro da Ría, con 40.000 habitantes ao redor, non hai Plan de Emerxencia capaz de facer fronte a catástrofe que provocaría, contiguo como está ademais ao Complexo Petroquímico.

O Comité Cidadán de Emerxencia para a Ría de Ferrol dende o ano 2000, en ausencia e sen amparo das administracións, veuse na obriga de defender a Vida, a Ría e a Legalidade ameazadas pola construción da Planta de Gas de Reganosa. Foron cinco ás sentenzas do Tribunal Supremo que confirmaron que Reganosa está baseada nunha flagrante ilegalidade e non cumpre coa normativa esixida para a construción deste tipo de instalacións. Sentenzas que anulaban a falsa tramitación ambiental que fixo Reganosa ou mesmo o cambio de usos dos terreos nos que se construíu a Planta; a modificación do Plan Xeral de Ordenación de Mugardos, feita polo Concello, que serviu para que se instalara a Planta; ou a resolución do goberno de Mariano Rajoy que eximía a Reganosa de ter que someter-se a avaliación de declaración ambiental (DIA)...  Mais agora a administración, baixo o goberno progresista se lle aprobou a DIA e se lle concedeu os permisos de construción e funcionamento. De todos os xeitos, fronte a este desprósito, o Comité Cidadán para a Ría de Ferrol ten presentado, unha vez máis, recursos contra estes novos permisos.

A regasificadora entrou ilegalmente en funcionamento o 4 de maio de 2007; como ilegais tamén foron as entradas na Ría dos gaseiros que abasteceron, durante anos á planta; irregulares os permisos concedidos tanto de construción e funcionamento; todo o mundo sabía que non cumpría a Lei no asunto fundamental da localización ao non respectar-se a distancia de 2000 metros que marcaba a Lei, ate que en 2013 a Xunta de Galicia elaborou unha Lei á medida de Reganosa...

Estamos diante do maior fraude cometido no noso país coa escusa de que o gas é estratéxico para Galiza.

INMEMORIAM

Ademais de Carmelo, lembramos a: José Gabeiras - presidente de honra do Comité Cidadán in aeternum (Xaneiro de 2005), Xaime Quessada autor do mural contra a imposición de Reganosa, mural que agora se expón no Auditorio Municipal de Ferrol (Decembro de 2007), Santiago Torrente 'Tito' (Marzo de 2009), Tino Deibe autor do logotipo do Comité (Maio de 2010), José Luís Estévez Barros 'Seli' (Decembro de 2011), Regino Varela (Xullo de 2014), Victoria Fernández Paredes, (compañeira de Carmelo, falecida o 8 de novembro de 2014), Ramón Capotillo (Febreiro de 2015), Luís Matalobos (Outubro de 2015), Julio Videira (Xuño de 2016), Joaquín Cupeiro (Decembro de 2016), Julio Pico (Xuño de 2017), Bernardo Bastida, (Xaneiro de 2018), Emilio Romero "Milín" (Marzo- 2018), Mel Sanxoán (Abril de 2018), José Luis Rodríguez Pardo (Xuño de 2018), Helena Sánchez (Novembro de 2018), Pepe Leira (Outubro de 2019), Ricardo González Costas "Cardín" (Xaneiro de 2020), Víctor Agulló López (11 de Xullo de 2021),  Eugenio Pereiro Couce (4 de novembro de 2021), Marichy Cuadrado Caruncho (14 de xaneiro de 2022) e Antonio Dopico Carro (23 de xaneiro de 2022).

Desde Ártabra 21 seguimos apoiando a loita do Comité Cidadán de Emerxencia.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc


_______

venres, febreiro 03, 2023

Podemos e a crise de goberno do PSOE ferrolán pola dimisión de Teresa Deus - Borja San Ramón lamenta a 'inestabilidade' do goberno local, e pide ao alcalde 'pensar a longo prazo'


Borja San Ramón (Podemos) lamenta a “inestabilidade” do goberno local, e pide ao alcalde “pensar a longo prazo”

Borja San Ramón, candidato á alcaldía de Ferrol por Podemos Ferrol, lamentou que a dimisión da concelleira María Teresa Deus na “recta final” do mandato “abre unha crise de goberno que Ferrol non se pode permitir”. O candidato reclamou ao alcalde reconfigurar o seu equipo “coa maior présa posible”, xa que ao seu xuízo “hai temas que precisan solucións urxentes”. As tarefas de Teresa Deus como concelleira de Economía, Facenda e Patrimonio, así como Recursos Humanos, Emprego o Promoción Económica son de tal peso dentro do Concello que dende a formación morada non entenden como o señor Mato non foi quen de manter a cohesión que precisa o goberno da cidade. Cuestións coma “a biblioteca municipal de Ferrol, ou o estado das instalacións deportivas, son problemáticas nas que as solucións non poden estar paralizadas”.

San Ramón considera que “a brevidade e a visión curtoplacista e partidista dos gobernos locais forman un círculo vicioso que pesa sobre Ferrol dende hai décadas”. Neste senso, fixo un “chamamento ás forzas progresistas a pensar entre todas un proxecto de cidade, deixando o lado intereses de partido, e sobre ese acordo, artellar un goberno amplo que garanta estabilidade e normalidade política sen sobresaltos”.

Ferrol, 2 de Febreiro de 2023

Aitor Cordero
Comunicación Podemos Ferrol
contacto@ferrol.podemos.info

https://www.facebook.com/PodemosFerrolOficial/

Enviado por:
Podemos Ferrol
-contacto@ferrol.podemos.info-
2 de fevereiro de 2023 às 17:04

_______

Hoxe venres 3 de febreiro, comeza o Ciclo de Cultura Democrática 'Cóntamo Ti', coa presencia dos exalcaldes de Ferrol: Manuel Couce, Xaime Bello, Juan Juncal e Vicente Irisarri - Ás 7 da tarde no Centro Cívico de Canido


CANIDO LANZA O CICLO DE CULTURA DEMOCRÁTICA “CÓNTAMO TI”

Coa colaboración das xornalistas Rebeca Collado, Marta Corral, María Luaces,
Araceli Pita e Alicia Seone.

En abril de 2019 a Asociación Veciñal de Canido organizaba un encontro con 8 candidatos á Alcaldía, baixo a metodoloxía “Pecha Kucha”, no que cada opción política expuxo o seu proxecto en 20 imaxes x 20 segundos, tendo tan só un total de 6 minutos 40 segundos para a exposición. Esta sesión tivo moito éxito en canto á participación numerosa dun público moi plural. Se ben, este método resultou moi ríxido para os candidatos, que apenas tiveron tempo para defender o seu programa.
Hoxe, as entidades residentes no Centro Cívico de Canido (AV Canido, ASC Muíño do Vento e Rádio Filispim) presentan un novo ciclo de 6 xornadas, no que pretenden dar a coñecer os candidatos ás Eleccións Locais, baixo un formato moito máis próximo e amable, con conversas que durarán 1 ½ hora.

O obxectivo deste ciclo é profundar sobre temáticas de interese para o barrio e a cidade, coñecer aos candidatos a Alcaldía e os seus programas concretos de actuación.

Inténtase achegar á veciñanza información valiosa sobre diversos aspectos das políticas públicas locais que tan presentes están no día a día, corrixindo certa desafección pola vida comunitaria. Neste sentido, chama a atención que Ferrol é unha localidade cunha alta porcentaxe de voto en branco, con gran fragmentación e polarización social, con cambios de goberno constantes, gobernos en minoría e unha falta de visión estratéxica, de futuro. Esta carencia de políticas públicas a longo prazo é aínda máis ameazante nun territorio que posúe uns indicadores socioeconómicos ligados a altas taxas de desemprego, pobreza e avellentamento da poboación. Ferrol precisa de altas doses de deliberación a de acordos en asuntos clave que excedan os períodos temporais dos 4 anos de mandato.

É así como nace o ciclo CÓNTAMO TI #ISTONONÉUNMITN, que dará inicio o próximo venres 3 de febreiro ás 19:00 horas no Salón de Actos do Centro Cívico de Canido cunha sesión inaugural. Nesta sesión participarán 4 ex-alcaldes (que xa non son elixibles na próxima convocatoria electoral). Algúns xa están retirados da política e van ofrecer a súa visión da cidade co paso de tempo e dende a súa experiencia de xestión.

Neste primeiro encontro contaremos con Manuel Couce (alcalde en 1989 -1991, 1991-1995), Xaime Bello (1999-2003), Juan Juncal (2003-2007) e Vicente Irisarri (2007-2011).

Nas seguintes sesións terán lugar varios diálogos cos candidatos á Alcaldía que xa foron presentados formalmente. Estes encontros terán lugar:

1.- Venres 10 de febreiro ás 19:00 horas, Jorge Suárez (Ferrol en Común)
2.- Venres 17 de febreiro ás 19:00 horas, Iván Rivas (BNG)
3.- Venres 24 de febreiro ás 19:00 horas, José Manuel Rey (PP)
4.- Venres 3 de marzo ás 19:00 horas, Ángel Mato (PSdG-PSOE)

O esquema de preguntas para os encontros cos Alcaldables seguirá o mesmo patrón: E ti, de quen vés sendo? Biografía da persoa candidata.

Dime con quen andas… Equipo de candidatura, sinerxías e colaboracións.

Éche o que hai! Resumo das propostas realizadas durante este mandato, vinculadas a Canido.

Que hai do meu? Principais liñas estratéxicas para Ferrol e en especial, plan de acción para Canido 2023/2027

En todas as sesións haberá un espazo para as preguntas do público, grazas a un sistema de tarxetas que serán clasificadas pola organización durante o evento, para trasladarllas aos poñentes. Aquelas preguntas que queden sen reposta, por mor do tempo, serán publicadas na web do evento: https://contamoti.avcanido.org/ na que se pode atopar toda a información do ciclo e na que se irá subindo información actualizada. Os eventos serán emitidos e gravados por Rádio Filispim. Unha vez rematadas as sesións individuais, celebrarase un encontro conxunto cos candidatos, cuxa data está aínda por concretar, previsiblemente a finais de marzo. Dende as entidades organizadores comunícase que se abre unha canle de recollida de desexos cidadáns, podendo enviar arquivos de audio con frases curtas nas que se manifesten necesidades concretas e proxectos a realizar (máximo 30 segundos). Os arquivos deberán ser enviados por e-mail avcanido@gmail.com Durante o último evento, conxunto entre os candidatos a Alcaldía, proxectaranse as voces da veciñanza. O ciclo pretende, ademais, ter continuidade máis alá das Eleccións Locais de Maio, con máis encontros de seguimento tanto do labor do goberno local como da oposición, tratando temas específicos que afecten ao barrio de Canido e ao municipio.

https://contamoti.avcanido.org/


_______

mércores, xaneiro 18, 2023

O H2Med protagonizará o cume hispano-francesa a pesar da súa dubidosa viabilidade - A rede 'Gas Non é Solución' sobre o hidroducto-proxecto H2Med


O H2Med protagonizará o cume hispano-francesa a pesar da súa dubidosa viabilidade

O proxecto H2Med/BarMar protagonizará as negociacións do cume hispano-francesa coa complicidade do President da Generalitat, Pere Aragonès.

Esta infraestrutura foi contestada por expertos e a sociedade civil organizada. A rede Gas non é Solución [*] e a Plataforma Resposta ao BarMar, radicada en Barcelona, sinalan este proxecto como unha falsa solución á crise enerxética actual.

O 19 de xaneiro celebrarase en Barcelona o cume hispano-francesa na que se tratarán varios asuntos, entre eles o H2Med, que aspira a ser a principal infraestrutura de hidróxeno verde entre España e Francia. A capital catalá foi especialmente escollida para centrar as discusións neste proxecto que conectará Barcelona con Marsella, tal como aseguraba a portavoz do Goberno español, Isabel Rodríguez, hai unha semana. O proxecto, ademais do apoio da Comisión Europea, Francia e Portugal, conta coa complicidade de Pere Aragonès. O President da Generalitat subliñaba hai uns días a súa vontade de aproveitar este cume para concretar e impulsar o H2Med.

Pero o avance das conversacións está a ser contestado pola sociedade civil. A rede Gas non é Solución (en diante, a rede), formada por máis de 30 organizacións, rexeita firmemente este proxecto. A esta oposición súmase a Plataforma Resposta ao BarMar, anteriormente conformada para responder á construción do gasoduto MidCat, xa abandonado.

O H2Med é unha aposta que pon en risco a viabilidade da transición enerxética, desviando para a exportación unha enerxía imprescindíbel para a descarbonización da demanda estatal. Ademais de usar un vector enerxético como o hidróxeno (H2) moi ineficiente, este tipo de infraestruturas perpetúan un modelo centralizado que vai en contra das persoas, o medio ambiente e segue privilexiando ás grandes empresas enerxéticas como Enagás.

O pasado xoves 15 de decembro presentouse ao fin o H2Med no rexistro de proxectos candidatos a recibir financiamento europeo. Esta infraestrutura suporá a construción sen precedentes dun conxunto de gasodutos que transportarán en principio hidróxeno producido a partir de enerxías renovábeis. Será adxudicada a Enagás e custará entre 2.500 e 3.000 millóns de euros procedente das arcas públicas. Comezará en Portugal co tramo Celorico-Zamora (CelZa) e continuará co tramo submarino Barcelona-Marsella (BarMar). O H2Med non se entende sen outras interconexións que involucrarán a Huelva, Cartaxena, Puertollano, Zamora e Xixón creando unha rede moito máis ampla e paralela á nosa rede actual de gas. Ademais, o proxecto presentado expón dous almacenamentos subterráneos de hidróxeno situados en cavidades salinas de Cantabria e o País Vasco.

A rede aclara que o hidróxeno verde pode axudar a alcanzar un sistema enerxético 100% renovábel. Pero a súa utilización debe reservarse para casos concretos nos que sería inviábel utilizar outro tipo de enerxía renovábel, especialmente para substituír o uso do hidróxeno como materia prima en determinados procesos industriais, así como naqueles que requiren de altas temperaturas que non teñen polo momento outras opcións de descarbonización.

Con todo, denuncia que esta aposta pola exportación de hidróxeno a gran escala implica grandes riscos debido á inmadureza da tecnoloxía que se contempla tanto na produción como no transporte de hidróxeno. O investimento público estaría mellor empregada en medidas cuxo funcionamento xa foi comprobado como o é a electrificación, a aposta por proxectos renovábeis con participación cidadá, o autoconsumo, as comunidades enerxéticas e melloras na eficiencia enerxética dos fogares.

Ademais, ás limitacións e riscos xa mencionados, as organizacións agrupadas na rede engaden as seguintes consideracións:

– Exportar grandes cantidades de hidróxeno implicaría a implantación de moitísimos máis proxectos de renovábeis de grandes dimensións que poderían ter un  alto impacto ambiental e territorial. Tamén existe o risco de que, ao non haber suficiente excedente de enerxía renovábeis, caia en producir o hidróxeno con gas fósil como é o caso do 99% do H2 obtido na actualidade.

O anterior risco aumenta debido á baixa eficiencia enerxética do H2, como sinalou xa o instituto de investigación independente Hydrogen Science Coalition. No proceso de produción de hidróxeno por electrólise a partir, por exemplo, de fontes renovábeis e durante o seu transporte por gasoduto, pódese chegar a perder ate un 80% da enerxía investida.

– Se finalmente o H2Med inclúe-se na lista de Proxectos de Interese Común (PICs), aspirando a financiamento europeo, podería acollerse aos controis ambientais menos esixentes introducidos polo REPowerEU. Como denunciou xa ClientEarth, este paquete de medidas destinadas a substituír o gas ruso outorga aos PICs a posibilidade de saltarse o principio de “Non Dano Ambiental Significativo” (ou “Do Non Significant Harm” en inglés) e estar exentos de avaliacións de impacto ambiental exhaustivos.

– Isto último faise especialmente relevante se temos en conta que atravesará o Golfo de León, un dos ecosistemas con maior índice de biodiversidade no Mediterráneo, onde se atopan espazos mariños protexidos, un corredor de cetáceos e o Santuario de Pélagos.

Por todas estas razóns, a rede Gas non é Solución denuncia a postura do executivo do Estado español. Tamén sinala o apoio que recibe da Generalitat, que ve o H2Med e concretamente no tramo Barcelona-Marsella (BarMar) “positivamente, no sentido de que marca a Catalunya e Barcelona como un punto neurálxico da nova estrutura enerxética europea”, en palabras de Aragonès. Os riscos asociados a este megaproxecto urxen a un debate social moito máis amplo, transparente e que involucre á cidadanía.

18 de xaneiro de 2023

A rede 'Gas Non é Solución'

[*] Os colectivos que integran esta rede son: 350 Bcn, Aliança contra la Pobresa Energètica, Amigos de la Tierra, Asamblea Ciudadana contra el Gas en Gran Canaria, Asociación de Cultura Popular Alborada (Gallur), Berriztu!, Comité Cidadán de Emerxencia para a Ría de Ferrol (Galiza), Ecologistas en Acción, Enginyeria Sense Fronteres (ESF), Equo, Equo Huelva, Ferrol-Cape, Fracking Ez, Fundación Renovables, Fundación Ecología y Desarrollo, Greenpeace España, Instituto Internacional de Derecho y Medio Ambiente, No Més Gas,Observatorio Crítico de la Energía, Observatori del Deute en la Globalització, Plataforma Ciudadana Zaragoza sin Fractura, Plataforma por un Nuevo Modelo Energético, Plataforma Resposta al Midcat, Plataforma Salvemos Doñana, Podemos, SEO/BirdLife, Transport & Environment, WWF España, Xarxa per la Sobirania Energètica.

Enviado por:
Manuel Amorim
-m.amorim@telefonica.net-
18 de janeiro de 2023 às 10:53

_______

mércores, novembro 30, 2022

Concentración en vilas e cidades de toda Galiza ante un novo asasinato machista - En Ferrol, o vindeiro 1 de decembro, ás 8 da tarde na Praza Amada Garcia



Concentración asasinato machista

A Marcha Mundial das Mulleres de Ferrolterra, ante o asasinato, o pasado domingo en Lugo, de Cristina Cabo Buján, chamamos a mobilización para dar resposta a esta nova agresión criminal e machista contra as mulleres.

Día: Xoves, 1 de Decembro
Hora: ás 8 da tarde.
Lugar: Praza de Amada García (Diante do Edificio da Xunta de Ferrol).

"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
https://www.facebook.com/marchamundialmulleres.galiza
twitter.com/MMMGaliza

Enviado por:
Marcha Mundial Ferrolterra
-mmmferrolterra@gmail.com-
30 de novembro de 2022 13:24

_______

Acto público do BNG en Ferrol, coa presencia de Ana Pontón: 'medidas contra a crise...' - Hoxe mércores 30 de novembro, ás 8 da tarde, no salón de actos do Antigo Hospicio - Tamén intervirá o portavoz municipal Iván Rivas


Acto público, medidas contra a crise.

A grave situación económica que estamos a vivir provoca que as súas consecuencias incidan de xeito directo sobre as costas das maiorías sociais deste país.

O custe da vida incrementouse nun 11% no último ano, especialmente nos produtos básicos coma o pan, leite, carne, cereais, peixe, verduras e hortalizas frescas…; mais tamén o custe da vivenda e transporte, cun encarecemento que empeora aínda máis as condicións de vida da poboación e a desbocada suba da electricidade.

O nacionalismo galego da man do BNG ten propostas para superar está crise de prezos e para presentar estas propostas, organizamos un acto público o mércores 30 de novembro ás 20 horas no salón de actos do Antigo Hospicio en Ferrol.

Neste acto público no que contaremos coa portavoz nacional do BNG, Ana Pontón.

Bloque Nacionalista Galego


Ferrol | Web | Facebook | Twitter.

Ferrolterra | Web.



Enviado por:
BNG de Ferrol
-bng@ferrol.es-
25 de novembro de 2022 14:14

_______

Mobilización en toda Galiza na defensa da Atención Primaria, este mércores 30 de Novembro - En Ferrol, ás 7 da tarde diante do centro de saúde Fontenla Maristany


HOXE MÉRCORES, 30 DE NOVEMBRO, ÁS 7 DA TARDE, CONCENTRACIÓN EN FERROL NA DEFENSA DA ATENCIÓN PRIMARIA, DIANTE DO CENTRO DE SAÚDE FONTENLA MARISTANY, NA PRAZA DE ESPAÑA.

Haberá mobilizacións simultáneas en todas as cidades e numerosas vilas da Galiza

Desde a Plataforma SOS Sanidade Pública de Galicia convocamos a toda a cidadanía a mobilizarse para salvar e fortalecer a Atención Primaria e a todo o Sistema Sanitario Público Gallego, seriamente ameazado polas política de recortes e desmantelamento da Xunta de Galicia e a Conselleira de Sanidade.

A Poboación sofre importantes trabas e limitacións para:

✅ Acceder e ser atendida de maneira presencial nos Centros de Saúde, PAC e Servizos de Pediatría de Atención Primaria.

✅ Soporta listas de espera de días ou semanas e consultas masificadas
✅ Estan a desaparecendo as consultas de pediatría.

✅ Moitos PAC están pechados al igual que moitos de saúde no rural.

✅ Boa parte dos Centros de Saúde perderon as actividades de promoción,
prevención, promoción, rehabilitación, atención ás enfermidades crónica e os programas da muller.

✅ O SERGAS acabou coa participación comunitaria.

✅ O persoal dos centros esta sometido a condicións de inestabilidade e precariedade laboral inaceptables e a unha enorme presión asistencial polo recorte de persoais e falta de recursos.

Desde a Xunta de Galicia e a Consellaría de Sanidade non hai ningunha vontade de facer fronte ao problema dado que para o 2023 orzamento sanitario apenas crece respecto a este ano, especialmente o de Atención Primaria que paso do 13,4% ao 13,7% do gasto sanitario total, tres miserables décimas para facer fronte á maior crise do sistema sanitario desde que se creo. Con este incremento es imposible recuperar a normalidade nas consultas de medicina familiar e os servizos de pediatría e os PAC pechados por falta de persoal medico e dos outros profesionais necesarios para unha atención de calidade.

Por todo iso desde SOS Sanidade Pública convocamos esta mobilización xeral de rexeitamento ao desmantelamento da Atención Primaria Pública e en apoio da Iniciativa Lexislativa Popular na que propoñemos que o Parlamento de Galicia debata e aprobe unha serie de medidas necesarias para solucionar a situación.

E necesario acordou redobrar os esforzos para recoller firmas para a ILP, informar á poboación do desastre da Atención Primaria e continuar convocando concentracións e manifestacións en todas as localidades de Galicia.

Reivindicamos un Novo Modelo de Atención Primaria que responda as necesidades da poboación, dotado dos recursos necesarios para atender os problemas e demandas de saúde da poboación, baseado na promoción, prevención, participación social e traballo comunitario.

As mobilizacións non van parar ata conseguir o obxectivo de salvar e fortalecer a nosa Atención Primaria.

SOS Sanidade Pública convocara unha nova manifestación en Santiago a primeiros do mes de xaneiro.

Soamente a alianza da poboación co persoal sanitario pode frear a deterioración do nivel primario de asistencia e a precariedade do persoal.

Seguiremos convocando novas actuacións unitarias.

Para contactar coa Plataforma SOS Sanidade Pública de Ferrolterra:

plataformasosanidadepublica@gmail.com

_______